3212/2022-2023

Aizawl 10th January 2023: Vawiin khan Information & Public Relations Minister Pu Lalruatkima chuan Midday News Bulletin chu AIR, Aizawl-ah tlangzarhin, Midday News hi a hmunah ngaihthlak nghal a ni a, nitin chawhnu dar 2:30PM a tihchhuah turin AIR Aizawl chuan a buatsaih a ni.

Midday News Bulletin hi Live Streaming Prasarbharati Apps, FM, MW channel-ah leh Satellite mode-in DTH ah pek chhuah a ni ang a. Mizoram a AIR FM Station zawng zawng Lunglei, Siaha, Taiping, Champhai, Kolasib ten an relay vek dawn bawk a ni.

IPR Minister Pu Lalruatkima chuan All India Radio hi khawvel pum huap pawha radio network lian ber an ni a, tawng hrang hranga thupuang darh tam ber an ni a ti a. Tun dinhmunah hian India ram 92% tuam chhuak tawhin kan ram population 99.19% hnen an thleng tawh a ni a ti a. All India Radio Aizawl Station hi July ni 31, 1966 khan din niin 150 Watt Transmitter hmangin bul tan a ni a ti a. Kum 1966 chho velah phei chuan radio chu mipuite thleng phak huapzau ber niin, mipuiin an tangkaipui hle a, chanchin thar thehdarh piah lamah zai leh hla thlan programme te khan mipui a awi hneh a, Pathian fakna hla te pawh radio ah ngaithla thin in, khang hunlai atang khan AIR Aizawl hian nasa takin mipui tan rawng an lo bawl tawh thin a ni a ti a.

Minister chuan All India Radio Aizawl in a programme a tihchhuah te hi Mizoram mipuite bakah State danga Mizo awmte leh Bangladesh leh Myanmar rama zohnahthlak ten an hlawkpuiin an tangkaipui hle a, zohnahthlak te insuihkhawmna hmanraw pawimawh tak a ni a ti bawk. All India Radio Aizawl hi vawiin ni thlenga thalai talent nei tha te chawikangtu leh vawrh lartu pawimawh tak ala ni reng a, radio hi a lar chho reng a, Social Media kan hman uar tak hnuah pawh hian Mizo mipuite rilru leh thinlungah radio in hmun a luah thuk hle a ni tiin a sawi.

Pu Lalruatkima chuan Social Media khawvelah kan awm tawh a, thuthang chhiar tur leh hriattur awm reng karah thubelhchian dawl lo tam takin a lo pawlh ve reng bawk a, amaherawhchu mipui ten thu chiang an lakna ber chu kan chanchinthar puangtu te, AIR News, Doordarshan News te hi a la ni reng a ni a ti a. All India Radio Aizawl in Midday News Bulletin hmanga thubelh chian dawl kan hre zung zung thei dawn hi a lawmawm tak zet a ni a ti a. Minister chuan All India Radio Aizawl in Midday News Bulletin chu mipui ten nasa taka an tangkaipui a, hmalam pan zel turin duhsakna a hlan nghal bawk a ni.

He hunah hian Pu Mangjangam Touthang, IIS chu khualzahawm niin, Mizoram chanchin tha tak tak ziaka, hma la zel turin Journalist te chu ngenin, Mizo thalaiten Journalism, Mass Communication zir intih hmuh ila, eizawnna tha tak a nih thu a sawi bawk a ni.

He hun hi Pu D.R Lalropuia, IBES chuan kaihruaiin kalkhawmte lawmna thu a sawiin Minister hi lawmpuina thilpek a hlan nghal bawk a. Pi Lalnunziri, PEX Head of Programme chuan lawmthu sawiin he hun hi a khar a ni.