No.3660/2020-2021

Vawiin khan Information Minister Pu Lalruatkima, bialtu MLA ni bawk hovin Dinthar Veng YMA Hall-ah Dinthar vengchhunga HSLC leh HSSLC, 2020 exam result chhuaka distinction-a pass chinte lawmpuina hun an hmang.

Pu Lalruatkima chuan zirlai hlawhtlingte lawmpuiin zirlaite chu ram nghahfak, nakina kan ram hruaitu leh enkawltu tur an ni, a ti. Zirna chu ralthuam tha, ram leh hnam humhalhna leh dam khawchhuahna a ni tiin an kal zelna turah zirlaite duhsakna a hlan a. Beiseina sang tak nen khawtlangin a thlir reng tih sawiin Mizoram chauh ni lo rampum huap inelna sangah pawh an hming a la lan a beisei thu te, ram leh hnam chhan nan zirnaah hlawhtling tur leh thiamna hrang hrang puakchhuah chu ram tana fahrin manhla nihna kawng a nih thu sawiin zirlai hlawhtling tharte a fuih a ni.

Information Minister Pu Lalruatkima chuan COVID19 chungchang sawiin March thla tawp atanga lockdown kalpui a nih hnuah naktuk atang hian ruahmanna thar hman a ni tawh dawn a, nunphung a zalen chhoh dawn avangin mimal tinte fimkhur thiam a pawimawh, a ti a. Lungthu pathum pawimawh tak tak - tlawmngai pawl, kohhran leh sawrkar ruahmanna leh tanhona avangin tun thlengin COVID19 vanga nunna chan kan la awm lo a, kan la him rih niin a lang, Minister chuan a ti.

Bialtu MLA a nih anga Dinthar khawtlang tana sawrkar hma lakna hrang hrang Pu Lalruatkima chuan a sawi lang a. Chung zinga langsar zual te chu -Smart City Project kaltlanga smart parking leh futsal inkhelhna siam tura hmalak mek te, Information Department hnuaiah Mini Theatre sak mek te, motor kawngpui sial bel tur leh junction zauh tura hmalakna te a tel a. Dinthar YMA Hall chei that nan MLA-LADS kaltlangin Minister hian cheng nuai 5 a pe bawk a ni.

Khual zahawm, bialtu Councillor Pu R.Thanglura pawhin fuihna thu sawiin eng kawngah pawh hlawhtling tura pawimawh hmasa ber chu thiamna a ni, a ti a. Sum leh pai, ei leh bar zawnna kawnga harsa zawkte pawhin midangte kan tlan pelh theihna awlsam ber chu zirna/thiamna a ni, tiin zirlai hlawhtling tharte chu kawng thui tak an la zawh turah taima lehzual turin a fuih a ni.

Vawiin programme-ah hian HSLC result chhuaka distinction mi 17 leh HSSLC-a distinction-a pass mi 7 hnenah chawimawina hlan a ni a. HSSLC result chhuaka top ten-a inhlangkai mi pakhat hnenah bialtu MLA Pu Lalruatkima hian laptop a pe bawk a ni. COVID-19 avangin Dinthar veng chhunga pass thar zawng zawngte chawimawina hun hman theih a nih loh avangin distinction-a pass chinte tan program buatsaih a ni a. Hlawhtling thar dangte chu an inlamah lawmpuina thilpek pek an ni thung a ni.