No.4183/2021-2022

Aizawl 5th March 2021: Zanin khan Mizo Zirlai Pawl (MZP) buatsaihin Hyve City Hall, Aizawlah Zoram Ni hman a ni a. Information Minister Pu Lalruatkima chu he hunah hian khuallian a ni.

Pu Lalruatkima chuan Zoram Ni kan hmanna chhan chu Zoram mipuiten Zalenna kan duh a, chumi avanga hmalak duhna thinlung atanga irh chhuak a ni, a ti a. India Sawrkarin a ram chhung ngeiah Jet Fighter hmanga a beih hial ngai awm chhun kan ni hi a lungchhiatthlak a tih thu a sawi a ni. Minister chuan hnam dang te hi kan zah tur a ni a, hlauh erawh kan hlau tur a ni lo, a ti a. Mizote hi hnam huaisen, tlawmngai, rinawm leh taima tia miten min hriat reng a pawimawh a ni, a ti bawk. 

Minister chuan Jet Fighter hmanga Aizawl leh hmun thenkhat beih a nih avanga harsatna tawkte hre rengin kan ramin zalenna a sualna kawnga harsatna hrang hrang tawkte kan tawrhpui takzet a ni, a ti a. He Zoram Ni hi Mizote harh tharna ni leh Mizote thinlungah Mizona (Nationalism) tuh thar lehna ni nise a duh thu Pu Lalruatkima chuan a sawi a. Mizoram lo hi ram kan nei lova, Mizo hnam kan nihna angin, kan hnam tan theihtawp chhuah tur leh lungrual taka hmalam pan tur te, State dangte tluk loh leh entawn kan nih theihna atana ngaihtuahna thar seng turin Mizo mipuite a sawm a ni.

March ni 5, 1966 khan Jet Fighter hmanga India Sawrkarin Aizawl a bomb hriatreng nan kum tin he ni hi Zoram Ni tia vuah a ni a. He ni puala hun hman, MZP Vice President Pu Andrew F Lalramnghaka kaihhruaiah hian MZP President Pu Lalnunmawia Pautu leh Pu F.Vanlalrochana te pawhin thu an sawi a ni.