1540/2025-2026

Lawngtlai, 23rd September 2025: Vawiin khan I&PR Director Pu C. Lalnunkima chuan District Information & Public Relations Office, Lawngtlai a tlawh a. Pu Zonunchama Ralte, DIPRO, Lawngtlai, leh Staff- te bakah Mizoram Journalist Association (MJA), Lawngtlai, ten lo dawngsawngin inkawmhona hun an hmang nghal a ni.

Pu C. Lalnunkima chuan DIPRO, Lawngtlai leh MJA, Lawngtlai te inkar a thawhhona tha tak awm thin chu lawmawm a tih thu tarlangin, hmalam hunah pawh thawhhona tha zawk nei zel turin a sawm a. A bik takin sawrkar thuchhuak dik taka thehdarh kawngah DIPRO Office chuan mawhphurhna an nei lian hle tih tarlangin, sawrkar rin tlaka thawk thin turin a chah a. MJA leh I&PR- te chuan mipuite tana an tangkaina hriatchain a tul hle tih sawiin, chanchin thar thehdarh kawngah tan la sauh sauh tura chahin, Lawngtlai District - mipuite tan a theihtawp chhuah zel turin a sawm nghal bawk.

MJA, Lawngtlai chuan I&PR Director in Lawngtlai a lo tlawh thei chu lawmawm an tih thu an sawi a. MJA leh I&PR chu thawkho tlat an nih thu tarlangin, sawrkar thuchhuak leh mipuite hriat tur pawimawh thehdarh kawngah theihtawp an chhuah tlan thin thu an tarlang a. Ram leh hnam siam that kawngah leh mipuite hnena thuthar thlen kawngah thahnem ngai taka an thawhdun zel tur thu an tarlang a ni.

Pu C. Lalnunkima hian DIPRO Lawngtlai Office - tlawh kualin, a enfiah nghal a. Nimin khan Serchhip DIPRO, Pi Lalnunmawii , Deputy Director, I& PR chuan a thawhpuite nen Director hi lo dawngsawngin inkawmhona hun an nei a, Hnahthial DIPRO Pu Lalnunfela hovin Hnahthial MJA- te nen inkawmhona an neih leh a. Ni zan khan Siaha DIPRO, Pi K. Ngosai hovin MJA, Siaha ten lo dawngsawngin inkawmhona an lo nei tawh bawk a ni. Director - hian vawiin vêk khan DIPRO Office , Lunglei tlawh turin a pan leh nghal a ni.