No.6463/2020-2021

Tukin khan Information & Public Relations Minister leh Aizawl West II Bialtu MLA ni bawk Pu Lalruatkima chuan Vaivakawn-Hunthar-Chanmari West lei tawlh avanga khawtlangin harsatna an tawhah, a theihanga hmala turin ahmunah tlawhin hmalakna tur sawi hona Aizawl Bawrhsap Pu R.Lalramnghaka, SIPMIU hotute, PWD hotute leh Vaivakawn, Hunthar leh Chanmari West Local Council te nen an nei.

Minister Pu Lalruatkima chuan Building engemaw zat thiah tawh a ni a, chhungkua 30 chuang zet chenna in chhuahsan an awm a, tun dinhmuna harsatna lian tak pakhat chu SIPMIU pipe feet 2 leh inches 4 a lian, feet 6 a thuka chu kum 2018 khan phum a ni a, Vaivakawn-Hunthar-Chanmari West area a lei tawlh zel hian pipe phum hi elh in, pipe hian lei tawlh zel tur pawh a chhan hle in a lang laiin, lei tawlh zelin pipe a hnawl tak zel avangin hmun dang che-lo tur pawh a ti che palh theih avangin helai hmun hi uluk taka zir chiang turin leh thal chhunga tui luanna mumal zawk leh kawng siam that dan tur District Disaster Management Authority, SIPMIU, PWD leh khawtlang hruaitute nen sawi khawm leh ni se, a ti a. Helai kawng hi inkal pawhna pawimawh tak a nih avangin sawrkar chuan a ngai pawimawh tak zet a, khawtlang hruaitute pawhin ngaihtuahna zau tak neia, sawrkar ruahmanna te thlawp turin a sawm a. Hunthar lamah piling, drainage system leh check dam te siam mek a ni a, helai hmuna lei chhung chetdan hi kan hriatthiam loh thil a nih avangin, harsatna kan tawk a, chung ang chu hriain, mipui te pawhin thuneitute hmalakna lo ngaichang thiam turin Minister Pu Lalruatkima chuan a ngen a ni.