No. 3447/2019-2020
Section 10(2)(1) of the Disaster Management Act, 2005 in thuneihna a pek angin National Executive Committee chuan Sawrkar laipui, State/ Union Territory Government hnuaia Ministry/ Departments leh State/ Union Territory thuneitute hnenah COVID-19 avanga inkharkhip (lockdown) turin thu a pe a. Hetiang a lo nih takah chuan State danga mikhual cham mek (migrant)-te mahni State-a haw tumin an phe suau suau a, hei hian kan inkharkhip chhan ber ‘midangte hlata awm(social distance)’ chu a chawkchhia a ni.
He harsatna thleng mek sukiang tur leh lockdown felfai taka kalpui a nih theih nan te, mi rama inhlawhfaa awm mek te phurrit tiziaawm turin National Executive Committee Chairperson chuan order No. 40-3/2020-DM-I(A) of 29th March 2020 a tichhuak a. Hei hian State/ Union Territory Sawrkarte leh State/ Union Territory thuneitute chu a chinfel dan tur ngaihtuaha hma la tur leh a tul dan anga thupek (order) tichhuak turin a ti a.
National Executive Committee Chairperson thupek ang leh Section 22(2)(h) of the Disaster Management Act, 2005 in thuneihna a pek angin Deputy Commissioner/ Chairperson te, District Disaster Management Authority te leh District Superintendent of Police te tihhlawhtlin turin Mizoram Sawrkar Chief Secretary leh Chairman, State Executive Committee ni bawk chuan March ni 30 hian order a tichhuak a ni.
1.District Disaster Management Authority te chuan mi rethei, chhuanchhamte leh lock down avanga tangkhang, mi ram atanga lo lut inhlawhfate tan riahbuk leh ei leh in tur a ruahman sak ang.
2.Heng mi ram atanga lo kal, mahni state leh mahni khuaa haw tuma chhuak ta te hi an awmna atanga hnai ber hmun remchangah Deputy Commissioner/ District Disaster Management Authority ten sawrkar quarantine facility-ah emaw awmna an siam sak ang a. Uluk taka endik an nih hnuah ni 14 tal an awm tir tur a ni.
3.Industry emaw, sumdawnna hmunpui emaw, dawr emaw lockdown avanga khar a nih chhung hian a neituten an hnuaia hnathawk an chhawrlai te hnenah, a hun bi pangngaiah, hlawh a bi kimin an pe tur a ni.
4.State dang atanga inhlawhfaa lo lut (migrant worker) te tiamin heng inhlawhfaa nitin eichawp zawng thinte hi mi inluaha an cheng a nih a, inluah man pek tur an nei lo a nih chuan, in neituten thla khat chhung inluah man an thing tur a ni lo.
5.In neituten inhlawhfa te leh zirlaite an hnawtchhuak a nih chuan he Act hnuaiah hian hrem theih an ni.
6.Village Level Task Force-ten harsatna an tawk a nih a, sawrkarin tih tur a bituk te hlenchhuak hlei theilo dinhmunah an lo ding a nih chuan District Disaster Management Authority te chuan volunteer tura inziak lut Aapda Mitra volunteer te, Home Guard volunteer te leh State Disaster Response Force-te an chhawr tangkai thei ang. Heng volunteer te chungchanga hriat tur pawimawhte hi State Control Room atangin lak theih a ni.
District Magistrate/ Deputy Commissioner leh Senior Superintendent of Police/ Superintendent of Police/ Deputy Commissioner of Police te chu a chunga kaihhruaina leh lock down measures tihchhuahte khi an kovah lain an hlen chhuak ngei tur a ni a. He dan zawmlote lakah District Disaster Management Authority ten dan hnuaiah a tul angin action an la tur a ni.
