No.2907/2021-2022

Aizawl the 8th November, 2021: Pi Lalzikpuii, Settlement Officer, Serchhip District chuan Village Council-in Inhmun lo ram an pek chungchanga hriat tur tul a hnuai ami ang hian hriattirna a chhuah-

Inhmun lo ram pek chungchangah Village Council-ten thil hriat chian tawk loh neiin an thu neihna tur an hre chiang lo niin a lang a, hemi avang hian hmun thenkhatah harsatna tawk pawh an awm thin nia hriat a ni. Heti a nih avang hian Village Council-in inhmun lo ram pek chungchanga hriat tur kan han tarlang e

1. Thingtlang khua, Revenue Department-in survey a la neih lohnaah Village Council hian inhmun a pe thei a; chenna atana ruahman huam chhungah chauh, mamawh tak tak leh an khaw mi ngel hnenah chauh pek tur a ni a, heng inhmun VC ten an pek hi mumal taka Village Council Record Book ah chhuilet theih ngei turin chhinchhiah vek tur a ni. (Rule 12(1): 14(1); 15(1}}

2. Revenue Department-in survey a neih tawhna khua Revenue Town kan tih ah te hi chuan Revenue Officer chauhin inhmun a pe thei a Rule 14 (2) of Mizoram (Land Revenue) Rules, 2013), Village Council-in inhmun lo pek loh tur a ni.

3. DC, SDO (Civil) leh BDO te thuthmun ah chuan Land Committee Chairman hi VCP ni lo in DC, SDO(Civil) leh BDO te an ni a, an ni hriatpuina tel lovin VC ten inhmun recommend na lehkha lo pek ngawt loh tur a ni e. DC, SDO (Civil) leh BDO te thuthmun nilova inhmun diltu an recommend a nih pawhin sorkar atanga pass pek a nih hma chuan neitu anga ngaih tur a ni.

4. Land Committee hi inhmun lo ram petu a ni lova, a mamawhte dilna chu Department lamin a tih tur a tih hnua lo enpula, an mamawh dante hriatpuia pek tlak an nih leh nih loh chungchanga comment siamtu tur a ni.

5. Land Committee hi VC hlang chauh awmna committee ani lo a, department hrang hrang aiawh te leh NGO leh Political party aiawh te pawh member an ni tih hriat tur a ni.

6. Ram Pass tihnun lehna atana dilna pawh Settlement Officer hnenah thehluh phawt tur a ni a, a tul anga verification tih fel hnuah report chu Land Committee Chairman hnenah thawn tur a ni.

7. Miin inhmun lo ram a rawn dil in Revenue atangin tehsak an nih avangin kha inhmun lo ram an dil kha a neitu nihna nghet an nei tihna a ni loa, approve a nih hma chu neitu anga inngaih tur a ni lo.