No.1107/2020-2020

Social Welfare Minister Dr. K. Beichhua chuan vawiin khan Chawlhhmun Agape Moral Reformation Organisation (AMRO) hmunpuiah COVID-19 hrileng avanga inkharkhip chhunga damdawi hmanga ruihhlo ngaite enkawlna, Opioid substitution therapy (OST) lakna tur social distancing uluk taka kalpui chungin a hawng.

Minister Dr K.Beichhua chuan thuchah sawiin, natna hrileng avangin khawvelin harsatna hrang hrangin a tawk meka, chutih lai chuan sorkarin ruihhlo ngaite harsatna a hriatpui a ni, a ti a. Ruihhlo ngaite engtin nge chhanchhuah annih ang tih ngaihdan atangin he hmalakna hi lo chhuak a ni, tiin a sawi. Social Welfare Minister chuan hrileng avanga khawvel kalphung pangngaia kal thei tawh lo karah ruihhlo nghei tumna tak tak nen ruihhlo ngaite chu inbuatsaiha, sorkar hmalakna tha taka thawhpui turin a ngen nghal a ni.

Social Welfare Minister Dr Beichhua leh Director Ankita Chakravarty chuan medical doctor an nihna zawn atangin ruihhlo ngaite hriselna endik nghalin, OST hi thlanchhuah bikte hnenah an ei tir nghal a ni.

Programme hi Social Welfare Joint Director A Vanlalzawni'n a kaihruaiin, Minister hi Mizoram Social Defence Board Vice Chairman K Liantlinga'n a tawiawm a. Ruihhlo ngaite damdawi hmanga enkawlna OST pekna hi, Social Welfare Department, Mizoram Social Defence & Rehabilitation Board, Mizoram Drug User Forum leh AMRO ten tangruala an buatsaih a ni.