No.829/2020-2021

Vawiin chawhma khan DC Conference Hall, Kolasibah Dr H Lalthlangliana, Deputy Commissioner hovin District Level Task Force on Covid-19 ten thutkhawmna hun an nei a. Lockdown chhunzawm leh chhung a khawtlang a inkaihhruai dan tur hrang hrang te sawi hona neih a ni.

Dr H Lalthlangliana chuan Mizoramah Covid-19 hri vei kan awm tawh lo ni a lang chu lawmawm a tih thu a sawi a, hun engemaw chen inkarkhipna kalpui a nih chhung a District Level Task Force te hmalaknaah lawmthu a sawi bawk a ni. Kolasib DC chuan Sawrkar ruahmanna angin ram pawn atang a lo haw, Vairengte Screening point paltlang chu ni 4.05.2020 thleng khan mi 926 an tlin tawh thu a sawi a, ramri a kal khan hmun 61-ah duty-na siam a nih thu te, Duty inchhawk angaih pawh a inchhawk thei turin thalai 456 inziaklut an awm thu te a tarlang a. Kolasib district paltlang a ram pawn atanga mihring lo lut te chu Doctor leh Screening point a duty ten uluk tak a an endik vek thin thu a sawi bawk a ni.

Dr H Lalthlangliana chuan, ram pawn atanga lo lut an awm mek zel avangin, dah hran leh enthlak chhung te nen chuan hun engemaw chen chu tha thlah lova fimkhur tak a inkhuahkhirhna kalpui a tul dawn thu a sawi a, tupawh ramri a duty-na hmun tlawh tum te chuan District thuneitute hnen a inhriattir a phalna lak a ngaih thu a sawi bawk a ni.

Pu Vanlalfaka Ralte, SP chuan Kolasib district chhung a hmun hrang hrang te chu, mipui pung khawm an awm lohna turin, nitin vil a nih tur thu te leh Sawrkarin inkaihhruaina a duan te inhrilhhriatna hun nei turin Mobile team siam a nih thu a sawi a. Inkharkhip chhunzawmna atan a inkaihhruaina dan Sawrkarin a duan ah hian Police te leh Village level task Force te chu thawh hona tha tak hnuai a hmalak a pawimawh thu a sawi bawk a ni.

Vawiin Kolasib District Level Task Force thutkhawmah hian ramri venhim uluk zawk kalpui a nih theih nan Border Safety Monitoring Team din a nih thu tarlan a ni a. He team hian ramri a duty-na hmun zawng zawng tlawh chhuakin an thil mamawh leh harsatna te a ngaihtuah sak dawn a ni. Kolasib district chhung a bungrua him zawk a chah thlen dan tur te, lirthei intlan chhawk dan tur leh a chuang thei zat tur te. Inkharkhip chhung a kaihhruaina dan bawhchhia inhrem chungchangte ngun tak a sawiho a ni .