No.482/2021-2022

Kolasib dated 11th May 2021: Vawiin chhun khan DC Circuit House, Kolasib tualzawlah Food, Civil Supplies and Consumer Affairs Department Minister Pu K.Lalrinliana chuan a bial, Kolasib Assembly constituency-a hrileng dona kawnga inkhuahkhirna kalpui mekah mi harsa zual țanpui ngaite țanpui nan leh chhuanchham an awm loh nan Kolasib Joint VLTF hruaitute hnenah sumfai a hlan.

Pu K.Lalrinliana chuan hrileng darh zel tur venna kawnga Mizoram sawrkarin inkhuahkhirna a kalpuinaah mipui khawsak dinhmun inchen lo tak tak an awm tih hriaa mi harsa zawk, nitin eichawp dapa inhlawhfa thin te ngai pawimawh turin a bial chhung Joint VLTF hruaitute chu a chah a. In lama inkhunghrang mek ten eitur an nghei lohna turin leh harsatna an neih lohna turin VLTF-te chu tangkai taka thawk chhunzawm zel turin a ngen bawk a ni.

Tukin khan Meidum, Pangbalkawn, S. Chhimluang, Awrpuara Veng, Bairabi South leh Bairabi North VLTF-te hnenah Supply Minister hian tanpuina a pe a, Kolasib town Joint VLTF aiawhin Pu C.Rothuamluaia, Joint VLTF Vice Chairman leh Pu Lallawmsanga, Treasurer-te hnenah Kolasib town VLTF 13-ten a tul apianga an hman atan cheng 10,000 theuh a hlan leh bawk a ni.