Directorate of Science & Technology, Government of Mizoram, Confederation of Indian Industry (CII) leh Intellectual Property Right Office India te tangkawpa buatsaih ni 2 awh tur Intellectual Property Awareness Programme chu vawiin chawhma dar 10:00 khan I&PR Auditorium ah Law & Judicial Minister Pu Lalsawta’n a hawng.
I.P. Awareness Programme hawnna thu sawiin Minister chuan Intellectual property lam chu Mizo mipui leh India ram pum pawh khawvel huapa a harh lo pawl kan nih mek laia, chumi kawnga inhrilhhriatna programme, Office of the Controller General of Patents, Designs and Trademarks te hmalaknaa pawl liantham FICCI, CII, ASSOCHAM leh PHD Chamber of Commerce te nena tangho a buatsaih a ni chu lawmawm a tih thu a tarlang. World Record siam nana Cheraw lam ropui kan huaihawt chung pawha kan hnam bila kan la hauh theih lo te, Mizo kutchhuak ‘Puan Ropui’ leh ‘Siniar’ te pawh keimahni ta bil a nih anga kan la puan theih loh te chuan harsatna min thlen dan te, a tul anga thuneitu hnena kan bawhzui chak loh vang a nih dan te a sawifiah bawk. Cyberspace / Internet lamah pawh sumdawnna khawvel a nih tawh avanga inkhin buaina a thlen fo dan te a sawi lang bawk. Mizo zaithiam, musician leh film siamtute pawhin a ruka CD copy a tam thin avangin harsatna an tawh dan te sawiin Minister chuan neitu nihna humhalh tlat tura chak taka hmalak a tul dan te a sawifiah bawk. Hmasawnna chak takin awlsamna leh zangkhaina tam tak a thlen laia harsatna a hrinchhuah te dang tura theihtawp chhuah tlan a tul tiin Minister chuan chumi lama kawng inkawhhmuh tura IP Awareness Programme buatsaih chu lawmawm tiin hlawkna a thlen ngei a beisei thu a tarlang bawk.
Vawiina I.P. Awareness Programme hawnna hi Dr R.K.Lallianthanga, Principal Scientific Officer, Science & Technology Department-in a kaihruai a, phai lam atanga mithiam lo kal - Pu Depak Kumar Lamba, Managing Associates, Remfry & Sagar, Pu Sujoy Sarkar, Asst. Controller of Patents & Design, I.P. Office, Kolkata leh Pu S.B.Datta, Associate Professor & In-charge (Project Cell) NIFT ten Intellectual Property awmzia, nihphung leh pawimawhna te, Patents, Designs, Trademarks & Copyright chungchang te, sumdawnnaa a pawimawhna leh thupui chi hrang hrang te an sawifiah a, zirhona tha tak neih zui a ni.
