922/2024-2025 

Dated Serchhip, the 24^th June, 2024: Vawiin khan sawrkar laipui Inter-Ministerial Central Team (IMCT)-te chuan Cyclone Remal vanga Serchhip District chhunga chhiatna thleng te a hmunah an endik a. Serchhip DC Pu David Lalthantluanga leh official dang ten an lo dawngsawng a ni.

Central Team te nen hian Serchhip DC Meeting Hall-ah thu pawimawh sawihona hun hman a ni a. He meeting-ah hian Serchhip DC Office leh District Holticulture Office ten chhiatna thlen dan report kimchang an pe a. District Agriculture Office, PHE leh PWD te pawhin Cyclone Remal avanga harsatna an tawh dan report tlangpui an pe bawk.

May ni 27 leh 28, 2024 a thlipui leh ruahpui avanga chhiatna nasa tak thlengah Serchhip District chhung khaw hrang hrangah in 60 vel bawr a chhia a, heng zinga 22 hi luah zui tlak tawh lo khawpa leimin leh tuihawkin a tihchhiat te an ni a, 38 te erawh chei thata luah leh tlak (partially damaged) an ni a. Serchhip District chhung VC 54 atanga report a luh danin leimin thlenna hmun hi hmun 23 a ni a. Report hi vawiin thlenga la lut a nih avangin nitin a zat hi a danglam reng a ni. 

Serchhip District mipui ten leilet an neihna hmun Zawlpui leh a chhehvel chu nasa takin Cyclone Remal hian a tichhia a. He leilet hi chhungkaw tam tak eizawnna hmunpui niin chawhmeh chi hrang hrang - zikhlum, bawkbawn, hmarcha, tomato, vaimim leh a dangte an ching a. Mizoram chawhmeha chawmtu “Vegetable bowl of Mizoram” ti hiala vuah a ni a. Vawiin thlenga report dawn danin Horticulture thlai hmanga eizawng loneitu 152 te a nghawng a, chhiatna thlenna hmun hi Hectare 130 vela zau a ni a, thlai a tihchhiat hlutna hi belhkhawmin cheng nuai 41.92 zet a nih thu Horticulture Department chuan an sawi a. Report hi danglam reng a nih avangin loneitute hloh zat hi hei aiin a la sang thei a ni.

Agriculture Department pawhin loneitu 54 te lo a tihchhiat thu leh a hmunhma pawh chipchiar taka an fan tawh thu an report a. Serchhip District chhunga agriculture crop chinna hmun Hectare 40 vel bawra zau  lo leh huan te cyclone hian a tichhia a ni. 

Thli leh ruahpui bakah tuihawk luang nasa avangin leilet te hi leivungin a chhilh nasa hle a. Tuilakna irrigation pipeline te a tichhia a. Kum tam tak intuak hnua an lei khawl ‘farm machinery’ te a tichhia a. Mission for Integrated Development of Horticulture (MIDH) hnuaia siam Sihdarh Zau Green House, East Lungdar a chhe hneh hle a; Serchhip District chhung hmun hrang hranga Green House Cluster dang 7 te pawh a khawih chhe nual niin Horticulture hotute chuan an sawi a ni.

Serchhip tlawhtu Inter-Ministerial Central Team ah hian Pu Jintu Das Director, Department of Agriculture; Pu Mahesh Kumar, Deputy Director – FCD leh Pu Rajveer Singh, Superintending Engineer, Ministry of Jal Shakti te an tel a. Vawiin nileng khan Zawlpui Zau leh Chawm leilet te an fang kual a. Serchhip DC Pu David Lalthantluanga bakah Agriculture, Horticulture, I&PR leh Irrigation hotuten an tawiawm a ni.