903/2024-2025

Aizawl dated 21st June 2024: Vawiin khan thlipui Remal avanga Mizoram hmun hrang hrang a chhiatna thleng endik tur a Sawrkar laipuiin a ruat,'Inter-Ministerial Central Team' te chu Lengpuiah lo tumin, Sairang, Sairang Dinthar leh Sihhmui a tui lian vang a chhiatna hrang hrang an endik a. Central Team-ah hian Pu Adelbert Susngi, Regional Officer, MoRTH, Pu Rajeev Singh, SE, Ministry of Jal Shakti, Pu Moti Ram, Assistant Commissioner, Rural Development-te an tel a. Pu PC Lalchunglura, Joint Director(Ops.), DM&R, Pu Isaac Lalrempuia, Addl. DC, Pu Hmingthanzuala, IPRO, PWD leh PHE-a hotuten Central Team-te hi an tawiawm a, Sihhmui Village Council hruaituten chhiatna thlenna hmun te an enpui bawk a ni.

Chhinchhiah danin May ni 28, 2024 a Remal thlipui avang khan Sairangah chenna in 28 tuiin a chim pil a, in dinglai 10 tui lian hian a khawih chhe tel a. Heng zingah hian Zirna in, Mosque leh Mandir a tel a ni. Sihhmuiah hian tui lian hian lawngleng 12 a la bo a, balu lakna kawng te tichhiain tlawng kam a nul siam thahnem tak a tichhe bawk a ni. Sairang Dinthar vengah hian chenna in 12 leh zirna in 1 tui lian vang hian a chhe bawk a ni.

Inter-Ministerial Central Team-te hi June ni 25, 2024 thleng an cham ang a, an cham chhung hian Greater Aizawl Water Supply Scheme Phase I & II, Melthum/Hlimen leimin te, Kulikawn leh ITI veng thlanmual te, ZMC Falkawn leimin hlauhawm lai te, Aizawl - Aibawk -Darlung inkar kawng te, Durtlang leh Kanan veng thlanmual te leh Zawlpui zau, Serchhip te hemi an tlawh dawn a ni.