People’s Right to Information & Development Implementing  Society of Mizoram (PRISM)  huaihawtin International Anti Corruption Day chu vawiin khan Aizawl-ah hman a ni a. Hemi pual inkhawm buatsaih chu I & PR Auditorium-ah Mizoram Larsap Lt. Gen. (Rtd.) M.M. Lakhera, PVSM, AVSM, VSM chuan a hawng.

 

 

Governor chuan hlemhletna corruption hian mi zawng zawng a nghawng vek a, chuvangin tu berin nge do ang tih chu zawhna awm thei tak a ni a ti a. Sorkar-in dan leh hrai tam tak a zam te hi dik taka zawm chuan hlemhletna dona chi khat a nih mai lai hian zawm lo leh palzamte chunga hremna lekkawh a ni lo fo hian corruption kan tih hi a ti punlun a ni thei em tih te chu zirchian ngai tak a ni a ti a. Mizoram Budget tarlangin 2007 ah khan Budget chu vaibelchhia 2602, 2008 ah vaibelchhia 3199 leh kuminah vaibelchhia 3206 chuang tiin hei hi Mizoram mipui zawng zawng nausente nen lam chhiar tel pawhin mi pakhatin Rs. 2500 zeta sem theih a ni tiin heng sumte hi a hmanna tur dik taka felfai taka hman a nih chuan hmasawnna namenlo hmuh tur a awm ngei tur a ni a ti. Khawvel pum huap ni bik hi Mizoramah pawh mi thahnemngai ten hman an rawt hi thil lawmawm tak a ni a. Hei hian corruption do kawngah zirtirna tha tak a thlen ngei ang Larsap chuan a ti.

He huna thusawitu dang Chief Vigilance Office leh Chief Secretary Pu Vanhela Pachuau chuan hlemhletna hi tumah hian kan do phal tak tak lo a ni em tih hi ngaihtuah tham a tling a ti a. Hlemhletna do tak tak tur chuan chan ngam (sacrifice) a ngai a ni a ti a. Bank sum puk rulh that duh loh nghawng pawi zia uar takin Pu Vanhela hian a tarlang a ni.

He ni pual Inter College Elocution Competition titha te hnenah Governor hian lawmman a sem a, lawmman dawngtute chu pakhatna J.H.Lalmawizuala, Hrangbana College, pahnihna Lalfakzuala, Govt. Aizawl North College leh pathumna Zoramthanpuia, Hrangbana College te an ni.

Seminar hawnna hi Pu Denghnuna IAS (Rtd.) in kaihruaiin PRISM President Pu Vanlalruata bakah political party hrang hrang aiawhten thu an sawi a. Chawhnu lamah seminar a chhunzawmin mi thlanchhuah bik Dr. JV Nunchunga, Pu Lallianchhunga, Rev. Rosiamliana Tochhawng leh Pu K.L. Liana ten an thuziak chhiar chhuakin sawihona hun hman a ni.