2162/2026-2027

10th September, 2026: Mizoram Badminton Association player pahnih (2), H. Lalthazuala leh Sainunmawia Sailo te chuan international level tournament-ah medal hlu tak tak an rawn hlawh chhuak a.

H. Lalthazuala hi Cameroon International 2026, September ni 3 atanga ni 6 chhunga Warda, Cameroona neihah Men's Singles Champion a ni a. 9^th Lagos International Classic 2026, August ni 26 atanga ni 29 chhunga neihah Men's Singles Runner up a ni bawk. Tunah hian Gopichand Academy, Hyderabad-ah a zir mek a, Chaltlang Badminton Club tan a khel mek bawk a ni.

Sainunmawia Sailo hian Yonex Sunrise India Junior International Grand Prix 2026, August ni 25 atanga ni 30 chhunga Pune, India-a neihah Boy's Doubles category-ah Bronze Medal a la a. Ani hi A-Zone Academy, Hyderabad-ah a zir mek a, Sihphir Badminton Club tan a khel mek bawk a ni.

Mizoram State Sports Council chuan medal lawmpuina hun hi Director, Sports & Youth Services Department Office Chamber-ah vawiin September 10, 2026 khan a buatsaih a, Mizo badminton player chhuanawm tak pahnihte hi an kal zelna turah duhsakna a hlan bawk a ni.

He hunah hian Mizoram State Sports Council leh Directorate of Sports & Youth Services hotute bakah Mizoram Badminton Association hruaitute an tel a, H. Lalthazuala nu leh pa bakah Sainunmawia Sailo pa te an tel bawk.