Ramngaw, thing leh mau, nungcha, sik leh sa, chhehvel boruak zawng zawng inlaichin leh inkungkaih zia puala Ni bik hman thin 'International Bio-Diversity Day' 22nd May chu Pathianni a nih avangin hemi puala inkhawm I&PR Auditorium-ah vawiin chhun khan Environment & Forests Minister Pu H.Rohluna hova hman a ni.
Inkhawm kaihruaitu PCCF & Principal Secretary Dr.S.S.Garbyal chuan inlawmna thu a sawi a. Hemi Ni puala thupui thlanchhuah 'Forest Bio-diversity : Earth's Living Treasure' sawi zauvin science thiamna chak taka a than mek rual hian he leilunga thilnung chi hrang (species) engzat fakau nge awm tih hi khawvelin a la finfiah theih loh a ni a, chutihlaiin nitin thilnung chi 1-2 kan ti hlum ziah thung a ni, a ti. Bio-diversity tichhe thei thil 4 langsar zual - sapel, ramngaw thiah, kan rama awm ngai lo nungcha emaw thing lakluh leh sik leh sa inlumlet te an ni a, heng lakah hian kan inven that a ngai a ni, a ti.
He Ni puala buatsaih 'Souvenir of Mizoram Biodiversity' tlangzarh paha thu sawiin E&F Minister Pu H.Rohluna chuan thilnung chitinte hmakhua hi keini mihringte hmakhua a nih ve tlat avangin tumahin biological diversity pawimawhna hi ngaihthah thei kan ni lova, hnam fing leh hmasawn zawkte chuan an hmun leh ramte enkawl leh venhim chungchangah nasa takin hma an lo la tawh nghe nghe a ni, a ti. Mizote hi hriatna kawngah kan thang chak ve viau a, biodiversity venhim kawngah pawh theih tawp kan chhuah ve a, mipuite pawhin chanvo leh mawhphurhna kan nei tih kan hriat fo a duh thu a sawi. National Biodiversity Authoriy bakah State Biodiversity Board pawhin mipuite chanvo hi humhim zel a tum tlat dawn a, hemi chungchang fel zawka kalpui a nih theih nan 'Mizoram Biodiversity Rules 2010' pawh hman thuai beisei a ni, a ti.
Vawiin inkhawmah hian Addl. PCCF & Principal Secretary to CM Pu L.R. Thanga chuan a lem nena entirin Mizoram bio-diversity dinhmun leh humhalh tulzia a tarlang a. Tlangram loneih leh sapel kan hrat lutuk te chu kan thanmawhbawk lian zual an ni tiin mi cheng zat chhuta silai chelek tam ber kan nih hial a rin thu Pu L.R.Thanga chuan a tarlang a ni.
Mizoram chhunga nauban dinhmun leh an hlutzia te a lem nen entirin Pu Chawngthantluanga, Orchidologist, E&F Dept. chuan nauban humhalh tura mipui mimir tanlak a tul thu uar takin a sawi a. Tunhnai maiah pawh hmarchhak bial atangin nauban cheng nuai 30-32 hu zet rukchhuah a nih thu a sawilang bawk.
