Kumtin May ni 22 hi khawvel pumah International Biodiversity Day atan hman thin a nih angin Mizoram ah pawh he ni hi hman tura inbuatsaih a ni a.

Hemi puala inkhawm hi E & F Department buatsaihin Champhai Venglai Hall-ah dar 11:00 AM ah neih a ni anga, E & F Minister Pu H.Rohluna Khuallian a ni ang.

International Biodiversity Day hi leilung leh a chhunga thil cheng zawng zawngte vawnhim kawnga kan mawhphurhna hlenchhuah theihna tur a inpekthar lehna atan a hman a ni.

Kum 1992 a khawvel ram hrang hrang hruaitute Brazil khawpui Rio de Janeiro-a inhmukhawm khan Thuthlung pawimawh tak tak pahnih an siam a, pakhat zawk chu ‘Thilnung tinreng Humhalhna Thuthlung’ (Convention on Biological Diversity) hi a ni a, a pahnihna chu ‘Sik leh Sa Danglam Dona’ (Convention on Climate Change) a ni.

Biodiversity tih hi Nunna Chi hrang hrang tihna a ni. International Biodiversity Day pawh hi Nunna chi hrang hrangte, an pawimawhna theuh nena kan inzah tawn sak a tulzia tih lanna turin kumtinin hman a lo ni thin a ni.

Convention on Biological Diversity hmunpui Montreal, Canada ami chuan kum 2009 atan chuan ‘Biodiversity and Invasive Alien Species’ tih hi a lo thlang a ni. A awmzia chu thilnung - thlai chi leh rannung tunhma kan rama awm ngailo leh tualto niloin hmun an rawn khuar a, harsatna chi hrang hrang an thlen thei a ni tih mi ten an lo hriatfiah theih nan a ni.

International Day for Biological Diversity hi khawvel pumah hman a nihna chhan chu leilung hausakna hlu takte hi thangthar lo awm zel turte tan vawnhim a nih theih nan a ni.

Mihringte damkhawchhuahna pawh hi min hualveltu thing leh mau, nungchate ah hian a innghat ve tlat a ni tih kan hriat a tul tawh tak zet a, khawvel ram hrang hrang in tunah chuan ralpui phiarin a buaipui tawh a ni.