‘International Day Against Child Abuse’ (Naupangte khawihchhiat dona ni) puala inkhawm vawiina SCERT Auditorium, Chaltanga buatsaih chu Pu K.Lalnghinglova IAS Commissioner & Secretary, School Education Department in a hmanpui. He hunah hian Pu K. Lalnghinglova chuan naupangte venhim leh kaihhruai uluk a tul thu uar takin a sawi a. Programme hi Pi Malsawmthangi Director SCERT in kaihhruaiin kalkhawmte chuan naupangte chunga nunrawnna, tihduhdahna leh pawngsualna te do turin an chakna leh theihna zawng zawngin thu an tiam a. He ni hmannaah hian School Education Department, Higher & Technical, SCERT, DIET, MBSE, RMSA, SSA hotute bakah ATC leh Synod Family Guidance & Counselling centre hotute pawh an tel a ni.

He ni hmannaah hian Pi Vanramchhuangi Director, Human Right & Law Network chuan thusawiin pawngsual chungchanga harsatna awm reng chu counseling a nih thu leh sorkar-in counseling cell din thei se a duh thu a sawi a, naupangte pawngsual laka an him nan awareness a pawimawh thu te a sawi.

Pi Vanlalruati Lecturer SCERT chuan thusawiin, Naupangte chunga tharum thawhna leh khawihchhiatna thleng thinte hi chak zawk leh awmze nei zawka do anih theih nan leh tun aia nasa zawka naupangten venhimna leh kaihhruaina tha an dawn theih nan he ni hi hman a ni tih a sawi a. Naupangte taksa leh rilru hi hliam a awl em em a. An taksa leh rilru hliam anih hian zirna kawngah pawh harsatna tam tak an tawh phah thei a, an taksa, rilru leh thlarau hi a puma venhim a tul a, zirtirna dik leh enkawlna tha, hmangaihna leh venhimna an dawng anih chuan mi hlawhtling leh nun hrisel neiin an thanglian thei dawn a ni tih  a sawi bawk.

Naupangte khawihchhiat dona ni hmannaah hian sawihona hun zau tak hmanzui a ni a, naupang enkawlna kawngah chhungkuaa tan lak a tul thu te, nu leh paten naupang chu mi kuta dah mai lova mahni ngeiin enkawl a pawimawh thu te leh naupangte hmakhua ngaihtuahna tak tak neih a tul thu te an sawi ho a ni.