947/2025-2026

Siaha the 26th June 2025: ‘Breaking the chain, Prevention, Treatment and Recovery for all’ tih thupui hmangin vawiin khan Govt Saiha College Seminar Hall-ah District Level Nasha mukt Bharat Abhiyaan (NMBA) huaihawtin ‘International Day against Drug Abuse & Illicit Trafficking’ hman a ni a. He hun hi Pi LS Lalbiakzuali, DSWO, Siaha chuan kaihruaiin Pu Abraham Beirazi Khithie, Addl DC chu Khuallian a ni.

Khuallian Pu Abraham Beirazi Khithie chuan United Nations in Khawvel pum huapa ‘Ruihhlo do Ni’ a a thlan June Ni 26 puala hun buatsaiha kalkhawm sawrkar mi leh sate, NGO hrang hrang aiawhte, zirtirtute leh school 16 atanga zirlai kalkhawmte chu lawmthu a hrilh a, vawiin programme chu an hlawkpui theuh a beisei tih a sawi.

Mizoram leh a bikin Siaha District in harsatna a tawh zinga lian ber pakhat chu Ruihhlo hluar ta lutuk chu a ni a, thalaite leh naupang zawkte nunna chena zuah lova laksaktu ruihhlo Do chu Sawrkar pawhin a ngaipawimawh tak zet, a ti. State Level-ah ‘Core Committee on Ruihhlo Do’ chu Chief Minister kaihhruaina hnuaiah din a ni a, chutiang zelin Working Committee, District Level, Village Level thlenga din a ni, a ti. Heng bakah Police lamte nen tangkawpin thlatin ruihhlo tihrem a nih theih nana theihtawp chhuah thin NCORD committee te, vawiin programme buatsaihtu District Level NMBA te leh NGO hrang hrang bakah Kohhrante nen thawkhoin awareness campaign pawh vawi tam tak huaihawt thin a nih thu a tarlang bawk.

Addl DC chuan ruihhlo la tem chhin ngailote chu kumin ‘International Day against Drug Abuse & Illicit Trafficking’ thupui ang takin an tihchhin loh nana zirtirna pek uar thar a, vawikhat tihchhin chuan addiction a hrin chhuah theih zia uar taka puangzar a, thalaite fuihthar tul a ti a, Sap thufingin ‘Prevention is better than cure’ a tih angin tihdam aia inven a finthlak zawk thu uar taka puanzar a pawimawh, a ti.

Kalkhawm zirlai naupangte chu ruihhlo lakah fihlim tlat turin a chah a, Nu leh Pate pawh fate entawn tlaka nung turin leh chhungkuaa bul tan that a pawimawh thu a sawi bawk. Faten inchhungah hlim tak leh thawveng taka an awm theih nan inchhung boruak nuam siam thiam a tul a, fate mithmuha zuk leh hmuam tih pawiti lo an awm thin te chu runthlak a tih thu a sawi bawk. ‘In hmun leh ram bakah hmasawnna ruhrel changkang tak tak nei mahila kan tu leh fate ruihhlo bawiha an tan si chuan ram rethei ber kan ni dawn a, khawvel lama hmasawnna a pawimawh rualin fate nunkawng dik an zawh theih nan ruihhlo laka inveng fihlim tlat tura zirtir a pawimawh hle’ a ti bawk a ni.

Resource Person, Pi Ellen Hlychho, Coordinator, Social Mission & Development, ECM Siaha chuan Thalaite leh Ruihtheihthil tih thupui hmangin uar tak leh kimchang takin zirtirna a pe a, zirlai naupangte nen hun hlawkthlak tak an hmang ho.

 He ‘Ruihhlo Do Ni’ denchhana buatsaih 30 Seconds Reels making competition lawmman semna chu Pi K Ngosai, DIPRO, Siaha kaihhruianain neih a ni a, lawmman dawngtute chu :

1) K Vanlalliani, New Siaha – Rs 3,000/-
2) K Vanlalhriattiri, New Siaha- Rs 2,000/-
3) Solomon K Beirachhihtha, New Colony- Rs 1,000/-

Anni bakah hian Mi 2 hnenah consolation prize pek an ni a,
1) Lalhmangaihropuia, Council Vaih- Rs 500/-
2) Jonathan Ngiachho Solo, New Colony-Rs 500/- theuh pek an ni bawk a ni.

Ruihhlo laka fihlim tura intiamkamna (Pledge taking) chu Pi Jenny Lalthanpuii, HA, DEO Office, Siaha kaihhruiana hnuaiah neih a ni a, Pi K Hmangaihsangi, Event Coordinator for World Drug Day chuan lawmthu sawiin neiin vawiin hun tihtawp a ni.