Vawiin hi International Museum Day a ni a, Mizoram ah pawh he ni hi hman a ni a. He ni puala programme vawiina Mizoram Art & Culture Department hnuaia awm Mizoram State Museum-in Museum Library-a an buatsaih chu Art & Culture Secretary Pu C. Thatkunga’n a hmanpui a. Programme hi Art & Culture Department Director Pu Ngurbiaka’n  kaihruaiin sawmbik MUP Unit panga ten an telpui bawk a ni.  International Museum Day lawmna chikhat atan vawiin nileng hian Museum hi hawn niin man chawi lovin a duh apiang tan tlawh thei a ruahhman a ni.  

Pu C. Thatkunga chuan Mizoram State Museum tobul te sawiin Museum hi a pawimawh a, thil hlui leh thil hlu kan neih te ngaihsanna leh ngaihhlutna chang hriat a pawimawh hle a ni, a ti a. Musuem-a thil dahkhawm te hi chu man to em em nilo mahse Mizo tan chuan a hlu a, heng thil atang te hian thangthar ten hmanlai chanchin an hriatna kawngah thil tangkai tak a ni a ti bawk.

Khawvel pumpuia Museum hrang hrangten ni bik, mahni remchan ang theuha a ruala an hman tlan turin International Council of Museum (ICOM)-in kum 1977 khan he ni hi International Museum Day atan a puang a ni. Mizoram State Museum chuan he ni hi kum 2004 atangin an hmang tan ve a. Museum Seminar/Symposium neih nan te, mizo kutthemthiam thil - belvuak, pawnpui tah-te leh mizo rimawi tum a taka entirna atan te an lo hmang tawh thin a ni. 

Mizoram State Museum building hi chawng ruk a ni a. Ground Floor leh 1^st Floor  te hi Office,  Store Room leh Reserve Collection room atan te hman an ni a. A bak zawng floor pali chu Museum Gallery atan leh Library atana hman an ni. Gallery paruk (6) a awm a, chungte chu - History Gallery, Anthropology Gallery, Ethnology Gallery, Textile Gallery, Zoology Gallery leh Archaeology Gallery-te an ni. Nikum khan mi 7141 ten Museum hi an tlawh a ni. 

Museum tlawh man hi November 2011 atang khan naupang tan Rs. 5 leh puitling tan Rs. 10 bithliah a ni a, school naupang,  zirtirtu hova en te chu aman chanve-a concession theih an ni a,  kum 65 chin chunglam tan enman a awm lo a ni. Mizoram State Museum hian Museum Objects 3704 an nei meka, heng zingah 936 te chu phochhuah niin a bak te chu Reserve Room-ah dah that an ni. 

New Secretariat Complex-a Museum Extension Building sak mek chu zawh tep a ni tawh a. Extension Building-ah hian Museum Objects-te pholanna tur leh Dio-rama - Dio-rama of Natural History, Dio-rama of Cultural Anthropology, Dio-rama of Water animals leh a dang te chhawpchhuah anih theih nan ruahhmanna siam mek a ni a. He building thar sak mek hi ruahmanna awm tawh sa ang chuan Museum of National Character ni tura ruahman a ni a. Hemi atan hian Hmarchhak state hrang hrang atangin hnam hrang hrang te ziarang leh an culture tilang thei tur thil te (Objects) Twelve Finance Commission atanga sum hmuh atangin lakkhawm nual an lo ni tawh a. Objects tam zawk hi lak khawm a la ngai dawn a. Tun dinhmunah hian Manipur, Nagaland, Assam, Meghalaya, Arunachal Pradesh- atangte in an la khawm nual tawh a. India rama museum lian atanga Geological Specimen lakkhawm tur tam tak an la nei a bawk a ni.