Prithibi (Guwahati NGO), Percept Networks, Guwahati leh Mizoram Sorkar Industries Department te tangkawpa huaihawt, ni 15 awh tur International N.E. Trade Expo hmasa ber chu vawiin chawhnu dar 1:15 khan Industries Minister Pu S.Hiato-in A.R.Ground ah a hawng.
Trade Expo hawnna thu sawiin Minister chuan India ram hmun kilkhawr ber Mizorama khawvel huap Trade Expo buatsaih a ni thei chu lawmawm a tih thu a sawi a, India Sorkar-in khawchhak ram dangte nena insumdawn tawnna tur (Look East Policy) kawng a bawhzui mek laia Trade Expo huaihawt chuan heng ram te nena inhmelhriat tawnna leh inkungkaihna tha zawk a hrinchhuah ngei a beisei thu a tarlang. Hmarchhak mite leh khawchhak ram danga chengte chu thlahtu thuhmun, pianhmang, hnam nunphung leh ei leh in lamah te inzul tak kan ni tiin Minister chuan inzawmna tha siama intihsawt tawn nana insumdawn tawnna kan neih chhoh zel a pawimawh a ni, a ti. Inelna thianghlim tak hnuaiah thenawm ramte hnena kan hralhchhuah theih zawng tur ngun taka ngaihtuaha kan lo inbuatsaih lawk a tul a ni, a ti bawk. Mizoram hausakna mau leh handicrafts leh puantah mawi tak tak te chu ram pawna hralhchhuah tlak khawpa quality thaa kan siam thiam a pawimawh thu Pu S.Hiato chuan a sawi lang bawk.
Parliamentary Secretary Pu Zothangliana pawhin Trade Expo chuan mipui tam tak hipa Mizo te khawhawi a tihzau ngei a beisei thu a sawi a, inkhawm kaihruaitu Principal Secretary Pu P.C.Lallawmsanga chuan chutiang Trade Expo mahni thilsiam phochhuahna chu hmarchhak mite mamawh tak a ni tiin Mizorama thilsiam chhuaktu te ten kawng zau tak a hawnsak ngei a beisei thu a tarlang bawk.
International N.E. Trade Expo-in a tum ber chu ram chhung, a bik takin hmarchhak bial chhunga thil siam chhuah leh kut themthiamna pho chhuah a ni a, Mizoram chhunga thil siamtu te bakah ram pawn Thailand, Egypt, Nepal, Bangladesh, Singapore leh Pakistan ram te atanga lo kalin stall an rawn hawng bawk a ni. He Trade Expo buatsaih nana sum senso zawng zawng hi Prithibi ten an rawn tum a, ni 1 April, 2013 thleng a awh dawn a ni.
