907/2024-2025

Aizawl, 22.06.2024: Tukin khan International Olympic Day pualin Olympic Day Run neih a ni a. Chanmari leh Sikulpuikawn atangin AR Ground pan in sports association hrang hrang atangin infiammi 1000 chuang an tlan a. Zing dar 7:00 ah AR Ground ah khuallian Sports & Youth Services Minister Pu Lalnghinglova Hmar hovin hun hman ho leh a ni.

Khuallian Minister Pu Lalnghinglova Hmar chuan infiammite chu Olympic Day chibai buk in, an kal zelna turah theihtawp chhuah turin a chah a. Sports & Youth Services Minister chuan Olympic Games ah infiamna discipline a inthlak ve reng thu a sawi a. He Games, khawvelin a ngaihhlut leh khawvel infiammite intawhkhawmna pui berah hian Mizo thalai tam zawk an la tel theih a beisei thu a sawi.

Tukin Olympic Day Run ah hian sports association anga tel tam ber te hnenah lawmman pek a ni a. Mizoram Badminton Association hnenah lawmman cheng sing khat pek a ni. Mizoram Football Association hnenah lawmman pahnihna cheng sang sarih pek niin, Mizoram Amateur Taekwondo Association ten lawmman pathumna cheng sang nga pek a ni bawk.

Mizoram Olympic Association President Pu Robert Romawia Royte chuan vawiin programme hi kaihruaiin, Pu V. Lalzawmliana, Secretary General, Mizoram Olympic Association chuan Report a pe a. International Olympic Committee President thuchah chhiar chhuah ni bawkin,  AR Ground programme hi Senior Vice President Pu F. Lalnienga, Mizoram Olympic Association chuan lawmthu sawiin hun a khar a ni.