Mizorama a vawikhatna ni turin paragliding-a khawvel pum huap inelna sang, International Paragliding Accuracy Championship:2020 chu February ni 12 atanga 16 inkar hian neih a ni dawn ta. A neihna hmun tur hi Serchhip leh Keitum inkar NH-54 hrul Chuanhnuai –ah a ni a. Ram hrang hrang 30 vel zet atanga paragliders thiam rual te inelna tur he International Paragliding Accuracy Championship atan hian inpuahchahna ngawrh taka kalpui zel niin, a vawrtawp a thleng dawn hnai ta.

International Paragliding Accuracy Championship hlawhtling taka thlen a nih theihna tura khaipa ber Organising Committee chu Sports Minister Pu Robert Romawia Royte kaihhruainaa din a ni a. He Committee hian a hnuaiah sub-committee peng pali a din a. Chungte chu Infrastructure Committee, Logistic Committee, Information and Promotional Committee leh Programme Committee te an ni. Heng Committee peng hrang hrang te hian event felfai leh tluang taka kalpui a nih theih nan hma chak takin an la a. Heng committee peng tinah hian sawrkar official te bakah Mizoram Aero-Sports Association (MASA) hruaitute an tel a ni.

Sports Minister Pu Robert Romawia Royte bakah Organising Committee Patron Pu C.Lalramzauva, Adviser to Chief Minister ni bawk leh official dangte pawhin a hmunhma hi vawi engemawzat an tlawh tawh a ni.

International Paragliding Accuracy Championship, 2020 neih hun hi kar hnih khat chauhin a daidang tawh a. Mizoram mipuiten he event lian tham, International Event hi ngaihlua, a hmunah pawh kal ngei tura sawm kan ni a. En man emaw ticket man emaw siam a ni lo a, a duh apiang tan en theih a ni.