No.4205/2021-2022

Aizawl, the 9th March, 2022: Nimin (8.3.2022) khan DC Conference Hall Serchhip ah District Task Force Committee on BBBP Serchhip bultumin ‘International Women’s Day’ hman a ni a, District Task Force Committee Chairman leh District Bawrhsap ni bawk Pi Nazuk Kumar, IAS chuan khuallian niin a hmanpui.

Khuallian Pi Nazuk Kumar chuan ‘International Women’s Day 2022’ lawmna hmang tur kalkhawmte chu chibai bukin, he ni hi hmeichhiate tana ni pawimawh leh chhinchhiah tlak anih thu a sawi a. Hmeichhe dinhmun hi chawisan ala tul tak zet a, khawvel puma property za zela pahnih chauh hi hmeichhe ta anih atangin hmeichhe dinhmun a lang chiang ani, a ti a. Hmeichhia ten hlawhtlinna an chanin chhuang taka lanchhuah tir ngam lova thup bo kan nei fo thin chu a pawi a tiin, eng kawngah pawh hlawhtlinna kan chang anih chuan kan inchhuang hle thin tur a ni, a ti. Hmeichhia chu Nu nih hnuah dinhmun a hniam zawk zia a lang fo thin a, tun aia nasa lehzuala chawisang tura tan lak a ngai a ni, a ti a. International Women’s Day hmang tura lo kal zawng zawng a bik takin hmeichhiate chu lawmpui in, tun thlenga an hnathawh that tam tak te chu mahni inchhuang tak chungin hmasawn zel turin duhsakna a hlan bawk a ni.

He hun ah hian Serchhip District chhunga kawng hrang hrang a Hmeichhe chhuanawm thlan chhuahte hnenah Serchhip District Task Force Committee on BBBP hminga chawimawina hlan niin, Hmeichhia Front Line worker atangte, Anganwadi Worker atangte bakah District chhung zirna In hrang hranga hmeichhia zirlai pass thate hnenah chawimawina thuziak hlan anni.

He hun hi Pi C. Laltleipuii, SDO(Sadar) Serchhip chuan a kaihhruai a, District Task Force Committee Memberte bakah Sawrkar Pisa hotute leh tlawmngai pawl aiawhte an tel a. Pi F. Lalnisai, SDC, Serchhip lawmthu a sawi a. He hun hman zawhah hian BBBP Serchhip ten ‘Art Workshop ‘ an buatsaiha Lemziak mawi tak takte chu a duh apiangte en turin DC Meeting Hall a tarchhuah a ni bawk.