Mizoram State Commission for Women, Social Welfare Department leh MHIP General Headquarters te tangkawp huaihawtin vawiin khan Vanapa Hall-ah ‘International Women’s Day’ hman a ni a, he Ni hi March ni 8-a hman thin a ni nachungin Mizoramah chuan remchan zawkna avangin vawiinah hian hman a ni. Indian Society on Tobacco & Health (Mizoram Chapter) President Pi Lal Riliani’n Khuallian chan changin a hmanpui.

International Women’s Day pual inkhawm hi Mizoram sorkar-a Secretary, Social Welfare Pi B. Sairengpuii’n a kaihruai a. Kumin atana thupui thlanchhuah “Connecting Girls, Inspiring Futures” (Tleirawl thangthar zawkte nen hmabak phurawm) tih thupui hmangin hmeichhe pawl hrang hrang aiawhten thu an sawi a ni.

Khuallian Pi Lal Riliani chuan khawvel pum huapin India rama hmeichhiate hi chanchhia leh hnuaichhiah hlawh nasa ber nia a hriat thu leh chutih laia khawvel huapa hmeichhiate tana Ni bik Mizoramah ngei pawh hman theih a ni ta chu thil lawmawm tak a ni, a ti a. He Ni hi hmeichhia tawh phawt chuan mahni tan mai ni lovin an hmeichhiatpui leh an chenpui zawng zawngte tana malsawmna ni ni thei tura tanlak theuh a pawimawh thu a sawi a ni.

Thusawitu dang Mizoram State Commission for Women Chairperson Pi Lalnipuii leh MHIP Gen. Hqrs. President Pi B. Sangkhumi te pawhin hmeichhiate dikna leh chanvo pawimawhzia tarlangin Mizo Hnam Dan (Customary Law) ding lai chu an duh khawp loh thu leh Mizo hmeichhiate hamthatna ngaihtuaha siam that thuai an duh thu an sawilang a ni.

Vawiina he Ni hmanna inkhawmah hian Mizoram sorkar hmeichhe officer langsar tak tak bakah pawl aiawh leh helam kawnga tui mi thahnem tak an kalkhawm a ni.