4549/2025-2026

20th February, 2026 : Ni 19.02.2026 (Ningani) khan Pi Lalrinpuii, Minister, SW, WCD chuan kaihruaiin March ni 8, 2026 a International Women’s Day (IWD), 2026 lo thleng tur lawm dan tur rel ho a ni a. Hmeichhe pawl hrang hrang bakah Kohhran Hmeichhe aiawh te leh SWWCD Department official te an tel a ni. March ni 8  hi Pathianni a nih avangin IWD 2026 lawmna hi March ni 18 ah Dawrpui Multipurpose Hall ah hman tura rel a ni. He hunah hian Mizorama hmeichhe pawl hrang hrang leh Kohhran hrang hrang hmeichhiate aiawh bakah Pavalai leh Men’s Fellowship lamte leh College Students te sawm tum a ni. International Womens Day lawm a nih leh a thupuite Mizorama hmeichhia awm zawngin zawngin an hriat a, an hman ve theih dan turte sawiho a ni a.

Hmeichhe pawl hrang hrangten hma lak theuh ni se tih a ni.  IWD, 2026 Theme chu ‘Give to Gain’ (Pekin Lukhawng a nei) tih hlawhtlin nan hian engtia hmalak tur nge tih te sawiho a ni a, IWD lawm dan tur Programme duansa thlir hona a nei bawk a. He ni ah hian IWD denchhenin rawtna dangte chu – (1) thenawmte bai insuah te, (2) hmeichhe sumdawng ten IWD puala discount neihte, (3) mahni thiam dan leh remchan dan ang anga keimahni aia khawsak hniamte puihna te, leh (4) March ni 8 ah hian YMA leh Kohhran chanchinbu ahte thuchhuah ni se.

Minister hian Mizorama hmeichhia chan chhe zawk leh harsatna tuarte theih ang anga tanpui leh khaichhuah tum theuh turin leh he IWD 2026-ah hian mahni theihna zawn theuha hmalakna nei theuh turin kalkhawmte hi a chah a.

 Hemi ni ah vek hian Women & Child Development hnuaia hmalakna hrang hrang in hrilh fiahna hun neih nghal a nib awk. Sensitization Programme on Safety & Security on Women & Children leh Meeting on Celebration of International Women’s Day, 2026 chu Women & Child Development (WCD) Department te buatsaihin hman a ni a. He hunah hian Mizoram chhunga Hmeichhe pawl hrang hrang aiawh te bakah Youtubers lam te pawhin an tel pui a ni. Session hmasa zawk Sensitization Programme on Safety & Security on Women & Children hi Pi Sailopari, Joint Director, WCD chuan kaihruaiin, Pi Flora Laltanpuii, Deputy Director (Women) chuan WCD department hnuaia Women Scheme hrang hrang awm te sawi zauna bakah Prohibition of Child Marriage Act (PCMA) 2006 sawina hun a hmang a, kalkhawmte hnenah Women Scheme hrang hrang, Mission Shakti hnuai ami, Hub for Empowerment of Women, One Stop Centre, Women Helpline, PMMVY, Nari Adalat, BBBP, PALNA, Shakti Sadan leh Sakhi Niwas chungchangte hrilh hriatna hun neiin, Mizoramah PCMA din anih dan te, District leh Village tinah Child Marriage Prohibition Officer ruat an nih thu leh State leh District level ah Child Marriage Prohibition Unit din anih thu te a sawi a. Hma lak chhoh zel anih thu te leh chak zawka kalpui zel anih thu a sawi lang tel bawk a ni. Pi Lalrammawii Kawilam, Assistant Director, WCD pawhin thusawina hun neiin, Mihring hmanga Sumdawnna – ‘Human Trafficking’ chungchang a sawi a. Kan ram changkanna in a ken tel khualzin kan tam zel dan leh chumi in a hrinchhuah zinga pakhat, ‘Taksa hmanga sumdawnna’ chungchang sawiin, kalkhawmte chu kan fimkhur tlan theihna tur, keimahni mai bakah kan thenawmte, kan lainate, he thil thalo in min tihbuai theih dan te, engtinnge kan inven ang, kan khawtlang hi engtinnge kan lo him theih ang ? tih te a rawn sawi a. Kalkhawmte’n thu tha tak tak leh bengvarthlak tak tak te ngaithlain zawhna leh chhanna hunte pawh hman nghal a ni.