Kum 2014 MP inthlan liam ta a candidate te sum hmanral endikna leh a hmawr bawkna turin candidate leh party agent te chu vawiin khan Aizawl DC Conference Hall-ah training hnuhnung neihpui a ni.

Vawiin training hi Election Officer Pi Lalchhandami’n a kaihruaia, Election Commission of India thudah angin candidate sum hmanral zawng zawng chu inthlan result puan atanga ni 30 chhung ngeia thehluh tur a nih thu te a sawi a. MP inthlana Mizoram a Returning Officer chu Aizawl DC a nih angin district dang zawng zawng a sum hmanral zat pawh Aizawl district a thehluh tur leh endik vek a nih tur thu a sawi a. ECI ruat Expenditure Observer, P.C. Majhi chu June 15 ah hian a lo kal dawn a, a lo kal huna sum hman dan tul pawimawh zawng zawng lo peihfel a tul thu a sawi bawk.

Training-ah hian party agent te an kal tha hle a. Asst. Expenditure Observer atan a ruat MZU mithiam pahnih Dr. James L.T.Thanga leh Dr. B. Lalremruata ten thil pawimawh hrang hrang an hrilh hria a ni.