2697/2023-2024

Dated Aizawl, the 6^th November, 2023: General Election to the Mizoram Legislative Assembly, 2023 atana inpuahchahna chuan a vawrtawp a thleng ta a, District hrang hrang 11 huam chhunga Assembly Constituency 40-a Polling Station 1,276 a inthlan buaipuitu tur, Polling party-te chuan an duty-na tur hmun theuh an thleng fel tawh a, naktuk November ni 7, 2023 zing dar 7 atanga tlai dar 4 inkara vote thlak turin Mizoram chu a inpeih tawh a ni.

Electoral Roll thar berin a tarlan danin Mizoramah vote nei mi 8,57,063 an awm a; heng zinga 4,13,062 hi mipa niin, hmeichhia 4,39,026 an awm a, Service voter 4,975 an awm bawk. Polling Station 1276 zinga 149 te chu P-2 Polling Station niin nimin khan an chhuak fel tawh a. Vawiin lamah P-1 Polling Station 1127 a duty turte an chhuak veleh a, vote thlak ni a duty tur Polling Official ruat mi 5,292 an awm a ni. 

Tun dinmunah inthlan duty tur leh EVM/VVPAT khawl indaih loh na a awmlova, venhimna lam thawk turin State Police personnel 4,518 bakah Central Armed Police Forces (CAPF) Company 50 rawih an ni a. Polling Station 765 ah Polling booth-a chet vel na te webcasting kal tlanga vil a ni dawn bawk. November ni 5, 2023 thlenga Dan phal loh thil man hlut zawng chu Rs. 4,05,17,522 a tlingtawh a ni.

Kumin inthlanpui atan hian Contesting Candidate174 an awm a, heng zinga 16 te hi hmeichhia an ni. General Election to Mizoram Legislative Assembly, 2023 atan hian Election Commission of India chuan General Observer 21, Expenditure Observer 14 leh Police Observer 11 te a ruat a ni.

Vote thlak nia vote tlak dante hi darkar 2 dan zelah Pollstar App kaltlanga report zung zung tura ruahman a ni a, inbiak pawh harsatna hmunah erawh MPRO kaltlanga chanchinin hrilhhriat tum ani. Poll day-a a tul ang te buaipui a ngaihven turin CEO Office-ah hetiang hian mawhphurhna hrang hrang changtu tur siam niin, biak pawh theihna pawh hetiang hian ruahman a ni:

State Control Room                           : 0389-2954392/8787622508

Communication Contact Room         : 9810832455

Media Monitoring Control Room       : 0389-2954392/8787622508

Webcasting Control Room                : 9612153577

EVM Control Room                           : 9436383058

Vote thlakni poll day zing dar 7:00 atanga tlai dar 4:00 thlenga duty turin Pawan Hans Chopper ruahman a ni bawk.  

Postal ballot hmanga vote tlak tawh dan vawiin 06.11.2023 tlaidar 5:00 thlenga hriat theih chin chu hetiang hi a ni:-

State Level MCMC kal tlangin AAP, BJP, INC, MNF leh ZPM atanga Print Media leh Electronic Media advertisement chhuah tur Pre-certification dilna lut zinga 10 te chhuah phalna pek a ni.

Naktuk November ni 7, 2023 (Thawhlehni) zing dar 7 atanga tlai dar 4 thleng hian vote a thlak theih dawn a, he ni hi Sawrkar chuan Public Holiday-ah a puan mai bakah Sawrkar hnathawk lote tan pawh hlawh kiam chuang lova chawlhni ‘Paid Holiday’ atan a puangbawk a. Dry day-a puan a nih avangin zu zawrh leh in phal a ni lo a ni. Representation of the People Act, 1951 Section 126 in a sawi angin naktuk tlai dar 4 thleng hi campaign lam hawi reng reng neih/kalpui phalloh hun, Silence Period a nih vangin mipuite Dan zawma insum hram hram turin kan inngen nawn leh a ni. 

Election Department chuan inthlanna huapzo, muanawm, felfai, dik leh lang tlang, India ram pum tana entawn tlak siam puiah mipuite a sawm a. Vote nei tawh phawt chu khua leh tui nihna anga mawhphurhnate hlen chhuaka vote thlak theuh turin a chah a. Kum hmasa lam zawnga vote tlate khuma India rama vote tlak thatna ber State kan nih theih nan thahnemngai taka tanrual puiah mipuite a sawm nawn leh a ni.