1658/2024-2025

Aizawl dated 20th August 2024: Vawiin chawhma khan ICT Training Hall, Khatlaah Directorate of Information & Public Relations bultumin Directorate leh District hrang hrang a DIPRO Office-a Technical staff-te tan ni 4 awh tur 'Technical Skill Upgradation Training for AVPA' chu Pu F.Lalfakzuala, Joint Director-in a hawng a. Pu Andrew H.Lalremruata, Deputy Director in hun kaihruaiin Pu Hmingthanzuala, IPRO chuan training kalpui dan tur sawi zauna hun a hmang a ni.

Pu F.Lalfakzuala, Joint Director chuan Sawrkar thuchhuah thehdarh kawng ah Electronic media leh Social media hman tangkai thiam a pawimawh thu sawiin chumi tur chuan I&PR department hnuai a Technical Staff-te chu intuaihriam a tul thu a sawi a. Electronic media kaihhnawih a Technology leh khawl chhuakthar te hmelhriat leh hman tangkai chu I&PR Department tih hmasawn nana thil pawimawh tak a nih thu a sawi a. Training hun chu thiamna thar chharchhuah nana hun tangkai tak a hmang turin kalkhawmte a fuih a ni.

'Technical Skill Upgradation Training for AVPA' ah hian Pu Saithangpuia leh Pu Lalrinzuala te chu Resource Person niin Directorate leh District Office atangin thawktu mi 24 in traning hi an tel a. DSLR, Gimbal leh Drone hman dan te, Studio recording tur a inpuahchah dan leh Green screen hman dan ahte inzirtirna pek a ni dawn a ni.