Vawiin chawhnu khan I&PR Department Champhai thawktute leh Champhai District MJA te chuan I&PR Conference Hall-ah inhlantharna hun an hmang.

He hun Pu C.Lalhnunpuia, MJA President  kaihhruaiah hian Dr.Lallawmkima,  DIPRO Champhai chuan thu sawiin, kumthar kaltaah I&PR leh media te inkarah thawhhona tha taka a awm chu lawmawm tiin kuminah pawh chhunzawm zel a beisei thu a sawi a.

Thawhhona a that poh leh sorkar chak zawkin a kal thei dawn a, mipui tan sorkar chhenfakawm zawk kan siam thei a ni, a ti a. Media mite Chu rinawmna, taihmakna leh dikna vawng a, hnathawk tur leh a tam thei ang ber che chhuak turin a fuih a. Kum 2018 chhungin thawhhona tha tak kan nei thei chu a lawmawm hle a ni tiin, inthlan hun chhunga Election Commission of India duhdan kawng hrang hrang media ten an tipuitling thei chu fakawm a tih thu leh, kumin Lok Sabha inthlanah pawh thawhhona tha tak nena inthlan hmachhawn leh theih a beisei thu a sawi a. Kumina thuthar thehdarh leh mipui rawngbawl kawngah kalkhawmte chu duhsakna a hlan a ni.

MJA aiawhin Pu Lalhmingmawia Pachuau, Executive Member MJA Champhai District pawhin thu a sawi a. MJA kan nihna hian khawtlangah mawhphurhna lian tak a kengtel a, kan mawhphurhna hlen chhuak tur leh huaisen taka kal turin dikna kan hlen chhuah a tul a. Kan nihna hriatchian pawh a ngai hle a ni, a ti a, Zahawmna vawn nun a pawimawh thu a tarlang tel bawk. DIPRO-in media te a kawng hrang hranga a huikhawmna chu fakawm a tiin lawmthu a sawi a, hei hi thawhhona tha siamtu pawimawh tak pakhat a nih thu a sawi bawkin MJA member te chu Pathiana innghat a, miten an mamawhna puitu ni thei turin a fuih ve bawk.

He hunah hian Pu ZD Dengliana, Executive Member,MJA Champhai District leh Pu Lalhlupuia, Secretary, Information MJA Champhai District te hnen atangin fuihna thu ngaihthlak a ni bawk a. MJA Champhai District General Secretary Pu C.Lalrinsanga chuan thu tlangkawmna leh lawmthu sawina telin inkhawm hi a khar a. MJA member leh DIPRO staff te chuan thingpui an inho nghal a ni.