Vawiin khan I & PR Mini Auditorium-ah Mizoram Journalist Association member te leh I&PR Department hotute chuan kum tina an lo tih thin angin kum 2018 kumthar atana Pathian hnena inhlan tharna hun leh thingpui inhona hun an hmang.

Pu David L. Thangliana, Director, I&PR Department chuan he programme hi kaihruaiin, Pathian kaihhruaina changa kumthar duhawm tak an chuangkai leh chu lawmawm a tih thu leh kumin chhunga Mizoram Journalist-te leh I&PR Department chuan thawhona hun tha tak an neih thin chu chhawm nun zel a nih a beisei thu a sawi a. Kum hmasa lama journalist-te tan state pawn a Study Tour tum li buatsaih chu hlawhtling taka kalpui a ni thei chu lawmawm a tih thu te sawiin, sorkar lama a remchan dan angin hmalakna dang pawh siam tum zel a nih thu te leh Press mite tan sorkar hmalakna hrang hrang Project Site visit tam zawk ruahman tum a nih thu te a tarlang a. Media platform hrang hrangah Mizoram chuan hma a sawn theih nan inkungkaihna tha tak nen thawhhopui zelah MJA member-te chu I&PR Director chuan sawmin, thil tulah chuan infinchhuah zel pawh tha a tih thu a sawi a ni.

MJA Gen. Hqrs. President, Pu Vanlalrema Vantawl pawhin thusawiin, I&PR Department chu MJA te tan nu leh pa nih tling tak an nih thu a sawi a. Mipui hnena thu hrilhhriat leh a tul anga zirtirna pek kawngah journalist-te leh I&PR Department chu hmanraw pawimawh ber zing a mi an nih avangin chumi kawnga hna an thawh danah pawh awmze nei zawkin hma la ho zel tura a duh thu a sawi a. I&PR Department Director thar chu MJA in duhsakna an hlan thu a sawi bawk.

He inhlantharna hunah hian Pu C. Lalnunkima, DD, I&PR chuan hunserh a hmang a. Journalist  lam atangin thu sawi engemaw zah ngaihthlak niin an zingah hian Prominent Journalist Pu Lalbiakthanga Pachuau pawh a tel a. MJA member te leh I&PR Department hotuten kumthar thingpui in hona hun hmanah hian I&PR Department leh thuthar lakhawmtute inkarah thawhhona tha a awm zel theih nan leh inkungkaihna awlsam zawk a awm theih nan, rawtna bakah kumin chhunga an hmachhawpte huam zau taka sawiho na hun an hmang a ni.