Mizoram Art Development Society (MADS) buatsaih ni li awh tur “Chief Minister Lal Thanhawla Art Workshop” chu Pu Jim K. Chozah, MIS, Director, Information & Public Relations Department chuan vawiin chawhma dar 11:00 khan Art Novelty, Chaltlang Venglaiah a hawng a, he hun hi Pi Lallianpuii, MIS, Dy. Director, I&PR, Mizoram Art Development Society Nodal Officer in a hmanpui bawk a ni.

Workshop hawnna inkhawm ah thusawiin Pu Jim K. Chozah chuan lemziakthiamte hi khawvelin a ngaihlu em em a, a ngaihlu telh telh dawn a ni a ti a, thuziak leh lemchan te hi hmuh tur a tam lain lemziak awmze nei hi hmuh tyur a tam lo hle a, lemziakthiamte talent hi mi nazawng neih chi a nilova, Pathian thilthlawnpek ropui tak anih avangin lemziakthiamte kutchhuak hi mihringte tan leh khawvel tan hian a pawimawh zual zel dawn a ni a ti bawk. Pu Jim K. Chozah chuan Mizorama lemziakthiamte kutchhuak chu India ram leh khawvel pum huap exhibitionah te phochhuah ani tawh thin a, Mizoram hmel timawitu leh tihmingthatu an ni thin a, hetih rual hian lemziakmite hlutna hi Mizorama cheng te zawk hi nasa lehzuala hrilhriat kan ngai a, eizawnna tling anih rualin a hlawkna kan lemziakthiamte hian an la tel tawk lo a ni a ti a, Mizoram Art Development Society te chu thawhpui nuam tak an nih thu leh thawhhona tha tak an neih chhunzawm zel a beisei thu sawiin Workshop hlawhtling tak an neih theih nan duhsakna a hlan bawk a ni.

Mizoram Art Development Society hi kum 2012 a din niin tunah hian member 72 an awm mek a, an din tirh atang kum tin Art Workshop hi an nei thin a, kuminah hian May ni 31, 2016 atanga June ni 3, 2016 thleng mithiamte kaihhruaina hnuaiah Art Workshop hi neih a ni ang a, June ni 4, 2016 (Inrinni) ah Art Novelty, Chaltlang Venglaiah an lemziakte phochhuahna hun an hmang dawn a ni.

Mizoram Art Development Society hruaitute chuan Art Workshop hlawhtlinna tura tanpuitu Mizoram Chief Minister Pu Lal Thanhawla hnenah lawmthu an sawi a ni.