Vawiin khan Information & Public Relations Minister Pu Lal Thanzara kaihhruaiin Sorkar hmalaknate zau zawka media kaltlanga puanzar dan tur ngaihtuahin Sorkar Department Media Nodal Officer-te Chief Minister Conference Hall-ah an thukhawm. Media Nodal Officer-te hi Inter-Departmental Media Co-ordination Committee-in development Department theuhva Nodal Officer ruat tura a duan anga kalkhawm an ni.

Minister Pu Lal Thanzara chuan Sorkar Department-ten kan hnathawh leh hmalakna kan neih hrang hrangte hi mipuite hriat tura kan puanzar a kan inhrilhriat hi Sorkar bat ve reng a ni a, Sorkar tan bawk a tangkai tur a ni, a ti a. Sorkar Department-te pawh an hnathawh puanzarna turin sum tam zawk ruahman turin a chah a ni. Publicity kawnga hmasawn tur hian thawhhona tha - coordination neih a pawimawhzia tarlangin, department-te an mal tlat chuan harsatna hrang hrang a awm theih thu leh, intelkhawm erawh chuan awlsam taka tih theih a tam thu te a sawi a. I&PR Minister chuan news a puanzar piah lamah Sorkar hnathawh kalphung chungchangah mipuiten zawhna leh hriat duh an nei thin a. Langtlang taka Sorkar a kal theih nan State Sorkar hnuaia hmalaknate inhrihfiahna hun khawtlang huap information campaign neih theih ni se tiin, a remchan theih dan tur chu Nodal Department (I&PR) - in lo ngaihtuah se, a ti a. Tangkai zawka Social media leh Sorkar Website-te chu hman ni se, a ti bawk.

Vawiin thutkhawmah hian DDK-a Mizoram Sorkar Programme – Mizoram Hmasawnna Lamtluang, NIB leh DDK ten thawhhona an siam, I&PR Media Cell kaltlanga Zirtawpni (7PM - 8PM) apianga chhuah thin chu Department tin ten tangkai taka senso tlem zawka an hmalaknate mipui hmuh leh hriata puanzarna a nih thu sawihovin, Department tin ten chhawr tangkai dan ngaihtuah zel se, ti a rel a ni a. Mizoram Journalist Association-te Sorkar Department hrang hrang hnuaia project/ scheme kalpui te tlawh a site-visit neihpui te, Sorkar hmalakna tlangpui tarlanna bu “Mizoram Today” chu Mizo leh Sap tawng a siam chhunzawm chungchang leh, DDK-a mipuite zawhna chhang tura Talk-Show buatsaih chungchang te sawiho a ni.

Meeting-ah hian I&PR Secretary leh Inter-Departmental Media Co-ordination Committee Member Secretary ni bawk Pu B. Lalthanliana leh Department hrang hrang Media Nodal Officer-te bakah Principal Secretary to CM Pu Lal Ramthanga, IFS, CM Press Secretary Pu LR Sailo, I&PR Director Pu Jim K Chozah leh Chief Media Officer Pu David L. Thangliana te an tel a ni.