4448/2024-2025

Aizawl dated 27th February 2025: Vawiin chawhma khan Dr. Vanlalthlana, Minister, Information & Public Relations Department chuan Lianchhiari Run Mini Theatre, Treasury Square, Aizawlah ni 2 awh 'Film Workshop for local Film makers' a hawng a. Pu C.Lalnunkima, Director, I&PR chuan Film Workshop hawnna hun hi kaihruaiin Pu Pratap Chhetri, Deputy Director, Nodal Officer, Films chuan Film Worshop chungchang sawi zauna hun a hmang.

I&PR Minister Dr. Vanlalthlana chuan Film chu khawvel leh India ram ah ngei pawh Industry changtlung sa tak a nih thu sawiin film lam a tui Mizo thalaite chuan khawvel hmuh ah an thiamna leh theihna phochhuahna atan leh eizawnna kawng a dinchhuah nan hmang tangkai thiam turin a chah a. Film siam ina a ken tel lemchan thiam bak ah script ziah te, rimawi te, thuam inbel tur ngaihtuah te, make up chi hrang hrang hmanthiam te hi Film Industry peng pawimawh tak tak vek a nih thu Minister chuan sawiin heng lam a tuimite pawh hian Film Industry an hman tangkai thiam a pawimawh thu a sawi. Dr. Vanlalthlana chuan I&PR department buatsaih Film Worshop-a tel film siam thin te, film siam leh chan lam a tuimite leh zirlaite chu Workshop atang hian thil thar an tangkaipui tur leh hmasawnpui tur zirchhuak ngei turin a chah a, khawvel huap ang pawh a zahpuiawm loh kutchhuak neih tum turin a fuih bawk a ni.

Ni hnih awh 'Film Workshop for Local Film makers' ah hian Pu Joshy Joseph, Kochi Kolkata Cocktail Production chu Resource Person a ni a. Workshop kalpui chhung hian 'Story telling technique',  'Importance of Sound design' bak ah Grant Thornton atangin 'UNNATI for Film Industry' tih thupui hmangin zirtirna neih a ni dawn a ni. I&PR buatsaih Film Workshop-ah hian Mizo film Director, Actor, Videographer, film siam lam a tuite leh MZU atangin Mass Communication department zirlaite an tel a ni.