3188/2024-2025

Dated Aizawl, 16th November 2024 : Tukin zing dar 6 khan I&PR Minister Dr. Vanlalthlana chuan Sikkim Press Tour a kal tur, Journalist te leh I&PR Official te chu Lianchhiari Run kawt, I&PR Office atangin a vailiam.

Dr. Vanlalthlana chuan Press Tour-a kal turte duhsakna a hlan hmasa a. Thil zir chhuah neih pawimawhna sawiin, zirchianna nen a hun hmang turin a chah a. Anni neih, kan neih si lohte, kan ram tana tangkai tur leh tha tur rawn hmuk chhuak u la, Sawrkar leh ram mipuite tana hmasawnna tur rawn puak chhuah tum rawh u tiin a chah.

Minister chuan rualawhnain hmasawnna a kaihhruai thu tarlangin, mipuite rual awt thei tura thu ziak lamah pawh tan la turin a fuih a. A bik takin Sikkim in Tourism lam an kalpui dan Mizoram tana tangkai tur chu uluk taka chhinchhiah tura fuihin, Press Tour tha taka hmang turin duhsakna a hlan nghal bawk.

Sikkim Press Tour - ah hian MJA atangin Pu C.Lalhmachhuana, Vice President, MJA leh  member dang 9, an vaiin 10 an tel a. I&PR atangin Pu Zonunchama Ralte, DIPRO, Lawngtlai leh Pu Hmingmawia, AVPA - I, Lunglei te an kal a ni.