No.1427/2021-2022
Aizawl 16th July 2021: Vawiin chawhnu khan Information & Public Relations Minister Pu Lalruatkima kaihhruaiin Department of Information & Public Relations leh electronic media- DD, AIR, LPS leh Zonet aiawhte SAD Conference Hall, MINECO-ah Covid-19 hri leng dona kawnga electronic media kaltlanga mipui zirtirna kalpui dantur an rel.

I&PR Minister Pu Lalruatkima chuan thu sawiin Covid-19 dona kawngah nasa lehzuala tan lak a ngaihthu sawiin, mipui zirtir leh Covid-19 chungchanga puanzar tur pawimawh thilah, sawrkar leh media (print leh electronic) ten thawhhona tha tak an nei chu lawmawm a tih thu a sawi a. Vawiin ni thlenga tlawmngaih chhuaha VLTF, LLTF leh Media mi leh sa te, nitin ram tana penchhuak te chungah lawmthu a sawi bawk a ni. Minister chuan tun dinhmun thlirin Covid-19 hrileng chungchanga mipui zirtirna chu inhrilh zawh tih a awm theih loh avangin a thar a tan lak a ngai tak meuh a ni tih kalkhawmte hnenah a sawi a. Sawrkar chauh ring lo a, mahni mawhphurhna hria a, khua leh tui tha nihna anga Covid-19 a darh zel loh nana theihtawp chhuah zel tur pawhin minister hian mipuite a sawm bawk a ni.

Meeting-ah hian DD, AIR, LPS leh Zonet aiawhte hnen atangin Covid-19 dona kawnga sawrkar hma lakna puanzar leh thehdarh an in peih reng thu ngaihthlak a nih bakah, thawhho tawhna te thlirletna hun tawi neih a ni a.

He meeting-ah hian mipuite zirtirna kawnga hmalakna hrang hrang slogan, video clips leh program awm thei te sawi ho niin, target audience mil-in I&PR Director Pi Lallianpuii hova hmalak ni se tih remtih a ni a. Hun remchang hmasa berah thutkhawm leh ni se tih a ni bawk a ni.

Meeting-ah hian Pi Hualsangi, Secretary, I&PR, Pi Betsy Zothanpari Sailo, Joint Secretary, Pi Lallianpuii, Director leh midangte an tel a ni.