1809/2022-2023  
Aizawl 3rd Septmber 2022: Vawiin khan I&PR Minister Pu Lalruatkima chuan V. Kungtea (Rairahtea), Saizawh West lehkhabu ziah ‘Cabin Kamchhuak’ chu Pi Zaii Hall, Synod Conference Centre, Aizawl-ah a tlangzarh.

Khuallian Pu Lalruatkima chuan lehkhabu tha tak mai ‘Cabin Kamchhuak’, Pu V. Kungtea (Rairahtea) ziah, a tlangzarh thei chu lawmawm a tih takzet thu a sawi a. Minister chuan zepthu a cheng lo a, a ziaktu hi vohbik tihte zinga mi a ni a, vohbik ni chunga hetiang lehkhabu a chhuah thei hian ngaihtuahna a tikal thui a, midangte tan chona nasa tak a pe a, Pathian hian a vohbik tih hi a tichiang hle a ni, a ti. Mizote hi hnam mak tak mai, lungleng thei tak, pi pute sulhnu han en leh han belhchian pawh hian, chhui zui theih tur leh thawnthu buatsaihna tham tling tak mai chanchin hi a phenah a lo inphum fo mai thin a, hei hian Mizo Literature pawh a tihausain, a tihlu zual hle a ni a ti a. Theih phei se chu Mizo thawnthu tam tak hi Sap tawng (English) hian siam thei phei ila chu, Sap pachal tam tak mittui ti tlatu hi a tam ngawt ang tiin Pu Lalruakima chuan Mizo thalai, thangtharte hian Mizote mahni kutchhuak ngei hi nasa zawkin an la hlut tulh tulh dawn a, chumi hunah chuan heng ziaktu thiam leh lar tak takte kutchhuak hi tun aia nasa zawk hian khawvel hmun hrang hrangah hnam dangte hmuh leh chhiar theih tur pawhin kan la pho chhuak ngeiin ka ring bawk a ni, a ti. Thil chhinchhiah tlakte ziaka lo dah thin hi thil pawimawh tak mai a ni a, Mizoten mahni tawng ngeia ziah/phuah (literature) humhalhna kawngah thleng hian nasa takin hmasawn zel a tul hle bawk a ni a ti. Ziaka thil dahthat leh humhalh hi ching thar ila, engtik niah emaw chuan Mizo thawnthu leh hlate hi University hrang hrangahte hmun laili tak mai a la luah a beisei thu sawiin Khuallian chuan vawiina lehkhabu tlangzarh tha tak ziaktu V. Kungtea (Rairahtea), Awmhar Cabin chuan lehkhabu dang pawh rawn puitlin leh ngei tur leh a hmalam hun atan duhsakna a hlan a ni.

Vawiina tlangzarh tak ‘Cabin Kamchhuak’ chu Dr. H. Laldinmawia, Associate Professor, PUC-in lehkhabu thlirna hun a hmang a. Tlangzarhna inkhawmah hian lehkhabu ziaktu V. Kungtea (Rairahtea) leh a pa Pu V. L. Piangenga bakah sawm bikte leh kalkhawmte atangin mi engemawzatin thu an sawi bawk a ni.