Azerbaijan-a India sawrkar palai Ambassador thar (Designated) Pu B.Vanlalvawna chuan vawiin khan I&PR Minister Pu Lalruatkima, Tourism Minister Pu Robert Romawia Royte leh Mizoram Chief Secretary Pu Lalnunmawia Chuaungo te chu an pisaah a kawm.

Pu Lalruatkima chuan Rural Development Department hnuaia scheme hrang hrang tarlangin Bangladesh leh Myanmar inrina laia awm khuaah Border Area Development Programme (BADP) kalpui a nih thu a sawi a. Heng hmuna khaw hrang hrang ten changkan lam an pan zel thu a sawi a. Thingtlang khua ten khawpui ruala ke an pen ve theih nan Rural Development Department chuan thahnemngai takin hna a thawh thu sawiin ramdanga hna an thawhdan pawh Rural Development hnathawk ten an hriat ve a pawimawh thu a sawi a. I&PR department kaltlangin MJA-te tan press tour huaihawt thin a nih thu a sawi a. Chanchinbu miten khaw hawi zau zawk an neih a pawimawh thu sawiin ramdang thlenga tour an neih a duhsak thu a sawi tel a ni.

Pu Robert Romawia Royte chuan Pu B.Vanlalvawna chu India sawrkar palai a nih angin Mizoram mamawh thil tih theih tam tak a nei dawn a, hei bakah hian a ambassador pui te leh ram danga sawrkar mi lian te nen inlaichinna tha a lo siam tawhte chhawr tangkaiin ram tana thil tha a tih ngei a beisei thu leh, mamawh an neih apianga an biak pawh thin tur thu a sawi a. Azerbaijan chu infiamna lam, a bik takin boxing lamah  an san avangin Mizoram-a boxer tha te hmasawn lehzualna turin intlawh tawn dan kawng zawn ni se, football leh games dang piah lamah cultural exchange thleng pawha neih dan zawn tha a tih thu a sawi. 

Mizoram Chief Secretary Pu Lalnunmawia Chuaungo pawhin Mizoram hmasawnna tur ngaihtuaha inhawng taka Azerbaijan Ambassador tharin Mizoram sawrkar hotute a kawm chu lawmawm a tih thu a sawi a. A hna zawm thar turah hlawhtling taka thawk turin duhsakna a hlan nghal bawk a ni.

Pu B.Vanlalvawna chuan sawrkar laipuiin kum thum kalta atanga kalphung a tih danglam dan sawiin ram danga India palai te hnenah budget pe in a bik taka focus tur State a thlan tir a, tuna Mizo IFS officer service lai kan neih mek pathum te bakah hnam dang IFS officer pathumin Mizoram chu an thlang tih a sawi a. Tourism, Sports, Art & Culture, Trade & Commerce lamah te Mizoram nena thawhho dan a ngaihven mek tih a sawi bawk. Azerbaijan-a India palai thar chuan Mizoram mipuite tana hna tangkai an thawh theih a awm a nih chuan theih tawp chhuaha tan zel a tum leh englai pawha a inhawn reng thu State sawrkar hotute a hrilh a ni.