1163/2026-2027 

Dated Khawzawl, the 24th June, 2026 : Vawiin khan Information, Public Relations, Printing & Stationery (IPRP&S) Department Minister Pu B. Lalchhanzova chuan Office of The District Information & Public Relations Officer (DIPRO), Khawzawl District hawngin, a hawnna inkhawm chu khuallian niin a hmanpui nghal a. I&PR Deputy Director Pu Andrew H. Lalremruata’n hun a kaihruai a ni.

Khuallian Pu B. Lalchhanzova chuan Information & Public Relations (I&PR) chu sawrkar hmalakna leh thuchhuah pawimawhte mipuite hriattura puangzartu pawimawh tak a nih thu sawiin, I&PR a chak loh chuan ram kalphung tam tak hi a tha lo zawngin a nghawng theih thu a sawi a. Tunlai khawvelah thu dik lo leh belhchian dawl lo a thang chak tawh em em a, I&PR chu chutiang thu dik lo do leta thu dik tak leh rintlak chhuahtu pawimawh em em a ni a, hemi kawngah hian Mizoram Journalist Association (MJA) te nen tha taka an thawhho a ngai, a ti a. Vawiin office hawnnaah khawtlang hruaitute leh Head of Office thahnem tak an tel chu lawmawm a tih thu sawiin, department hrang hrangte inakarah thawhhona tha a awm tih a lantir a ti a.

Minister chuan sawrkar hna thawkte chu hlawh la tur ringawta thawk lovin, ram hmangaihna thinlung pu chunga mipuite rawngbawlna a ni tih hriaa, rinawm tak leh inpekna tak tak nena hna thawk turin kalkhawmte a fuih a. Kan hnathawh mi dangin min hriatpui lo a nih pawhin mahni koa tla eng hna pawh rinawm tak leh phur taka kan thawh a pawimawh, a ti a. District hrang hranga DIPRO office-te chu staff leh hmanrua la nei that awk lo mahse rim taka theihtawp chhuaha thawk zel turin a chah bawk a. DIPRO office thar chu Khawzawl district tan malsawmna ni turin duhsakna a hlan a ni.

Vawiin office hawnna inkhawmah hian IPRP&S Secretary Pi Betsy Zothanpari Sailo chuan kalkhawmte lawmna thu a sawi a. Khawzawl Bawrhsap Pu K. Vanlalthiana pawhin thu sawiin, Khawzawl District-a DIRPO office hawn a ni chu lawmawm a tih thu leh hei aia thawm that zel a nih a beisei thu a sawi a. Khawzawl DIPRO Pi Lalchungnungi Lakher chuan Khawzawl DIRPO office chanchin report a pe a. I&PR Director Pi K. Vanlalsangi’n lawmthu sawiin hun a khar a ni.

He hunah hian Directorate of I&PR atangin Dy. Director Pu Pratap Chhetri leh Dy. Director Pi Emily Lalrinpuii Sailo te bakah Saitual DIPRO Pi F. Zodingpuii leh Champhai DIPRO Pu Lalzara te an tel a. Khawzawl official Addl. DC Pu K. Zorammuana, SP Pu F. Lalbiakzauva, Minister PS Pu Remlalliana Hnamte, PD Pu K. Lalhmuakliana, SDO Pu Chandrakant Bagoria, BDO Pu Timothy R. Lalhmangaiha, 2nd IR Commandant Pu Vulmawia Khiangte, PHE EE Pu Liantluanga Chohte, SBI Branch Manager Pu Thangkhanlian Tonsing, GKZC Principal Pi Lalruatmawii Tlau, DC State Tax Pu C. Lalthazuala, DCSO Pu Patrick Thiandinga, DAO Pi Lallawmzuali, DFO Pu Lalnunthanga, END Asst Commissioner Pu Joseph C. Lalhmangaihzuala, CDPO Pi Esther Laltlinpuii te an tel a, SYMA President Pu PC Rosiama leh MHIP President Pi Lalmuanpuii te an tel bawk.

Office hawn a nih hma hian Minister Pu B. Lalchhanzova chu Bawrhsap Pu K. Vanlalthiana leh official dangte leh Khawzawl MJA member-te nen DC office-ah inkawmna hun an hmang a, DIPRO Office hmun tura ruahman an tlawh ho nghal bawk.