Hmarchhak bial tlawh chhuak tura thlan chhuah, Sardar Vallabhbhai Patel National Police Academy-a IPS Probationer 17-te chuan vawiin chawhnu khan Mizoram Governor Pu Kummanam Rajashekharan chu Raj Bhavan-ah inkawmna hun an hmanpui a ni.

Governor chuan Mizorama a la awm rei loh thu sawiin, tawnhriat a la ngah tawk lo in, an ni anga Mizoram chinchang a zir chhoh ve mek zel thu a sawi a. Mizorama tlawmngai pawlte chu an chak in, mipuite an hawihhawm a, nungcha leh thing leh mau humhalh an ngai pawimawh a ni, a ti. Tourism lama Mizoramin hmasawnna tur tam tak a neih thu te leh khualzinte tlawh hlawh ni tura dal thei awmte an sawi a. Governor chuan thalaite tana zirna sang zawk a ngaih pawimawh thu sawiin, tun hnaia Kerala-a zin khan, Rajdhani Group of Institutions chuan Mizoram zirlai naupang 100 te tana zirtirna a thlawna pek an inhuam thu an lo sawi a ni, a ti. Mipui hriselna leh khuarel chhiatna laka in venhimna leh tihnep dan te a ngaih pawimawh thu a sawi bawk a ni. Ram hrang hrang atanga Probationer kalkhawmte chuan an inpumkhatna a lantir tiin, an kal zelna turah duhsakna a hlan nghal a ni.