No.3354/2021-2022

Aizawl, the 10th December, 2021: Sub- Committtee on Quality Control of Cement & Iron Rod chuan dt 9th Dec 2021 khan a thawhhnihna atan Aizawl khawpui chhunga Iron Rod Dealer-te dawr an endik a, hetah hian TMT iron rod zawrh tura an kawlte chu a size anga an sawi a tlin leh tlin loh te, a size anga a buk zat tur BIS (Bureau of Indian Standards ) in a sawi a tlin leh tlin lohte an endik.

Sub-Committee hmuhchhuah dan chuan Aizawl khawpui chhunga iron rod brand tam tak chu a size anga an chhal a tling lo nasa hle a. Bureau of India Standard chuan iron rod te hi an size a zirin a seilam inang ( 12 meter) ah a rih zat tur bituk a nei a. Tuna Aizawl iron rod tam tak chu a size a tlin loh vangin a buk a tling thei ta lo a. Hei hi a chhan ber chu buk lovin, a mal ( piece)-a an hralh vang leh a leitu in buk tir nachang a hriat loh avang a ni. 20 mm tlawn khatah hian kg hnih chuanga tlinglo te pawh hmuhchhuah a ni,Rod size dik lo avang hian building sakte pawhin a tuar nasat hle rin a ni. Size hisapa structure engineer te’n building an design thin avangin rod size tling lo chuan chakna a hloh nasat rin a ni bawk. Tin, a rihna hisapa a man chhiar anih vang hian a piece anga leituin an hloh nasa tih pawh hmuhchhuah a ni.

Mizorama kan rod leite hi a tlangpuiin bukna hmang veka hralh leh lei a ni thin. Controller of Legal Metrology chuan sumdawngte chu iron rod an zawrhin bukna kawl vek tur leh a leituin a duh chuan buk sak ngei turin hriattirna a chhuah tawh a. Hun engemaw lai atang khan a mal ( piece)in dealers-te hian zawrh an intih hmuh a, a size tling lo thlengin a lo hluar chho ta zel niin a lang.

Dt 9th Dec 2021 leh dt 2nd Dec 2021 a inspection neih chhungin Sub-Committee on Quality Control of Cement & Iron Rod chuan Aizawl khawpui chhunga dawr 61 (sawmruk pakhat) atangin iron rod 5,29,000 kg (approx) an man tawh a. Heng iron rod te hi company hrang hrang - SMS Steel Durgapur, Mega Turbo Durgapur, Sagar Durgapur, Lotus Durgapur, Trishakti Durgapur, Maithan Steel Durgapur, Zeecon Durgapur, Sshakti, Keshri, Datal leh Aicom brand te niin Legal Metrology Act 2009 hmanga man leh hren a ni. Quality Control Labs, PWD lamah a tensile strength etc te test turin hmalak mek a ni.

Sub-Committee on Quality Control of Cement & iron Rod ah hian Secretary, FCS &CA chu Chairman niin Joint Controller, Legal metrology chu Member-Secretary a ni a. Department hrang hrang FCS&CA, PWD, DC (Aizawl), Commerce & Industries, Mizoram Police, I &PR, Taxation Department bakah CYMA ,MJA leh Mizoram Consumer’s Union te an tel a ni.