Vawiin khan DRDA Conference Hall, Lunglei-ah ni 3 chhung awh tur Integrated Watershed Management Programme (IWMP) Lunglei District hnuaia Batch-IV & V te hnathawh dan tur ruahmanna, Detailed Project Reports (DPR) zirhona leh watershed Development Team (WDT) lak tharte tana ‘Sensitisation-cum-Training’ nei tan a ni.

DPR Training Pu Lalchunglura, Account Officer, DRDA kaihhruaiah IWMP Project Manager leh DRDA Project Director, Lunglei District ni bawk Pu Joseph Lalramsanga chuan hawnna thu a sawi a; State Level Nodal Agency (SLNA), Dirtectorate of Rural Development atanga lo kal Pu Jedid Lalnundanga Keivom, Technical Expert (Engg.) leh Pu Abraham Lalchhanhima, Asst. TE ten zirtirna an pe bawk a ni.

Lunglei District-a IWMP Batch-IV & V-ah hian Project 2 ve ve a awm dawn a, khua 8 a huam dawn a ni. Tunah hian Batch-I atanga Batch-V thlengin Lunglei District-ah IWMP Project 14 kalpui mek a ni ta a, khua 42 a tuam mek a ni.

IWMP hi Centrally Sponsored Scheme niin Mizoram-ah kum 2009-2010 khan bul tan a lo ni tawh a. Rambua leh chhe mek chei that te, tui leh leilung luangral tur venhim te leh thingtlang miretheite khawsak phung leh eizawnna ngelnghet siamsak te hi a tum ber a ni. Tunah hian Mizoram puma District zawng zawngah Project 78 lai kalpui mek a ni a, khua 270 a tuam mek a ni.