No.147/2021-2022

Lunglei the 15th, April’2021: Vawiin chawhnu khan District Rural Development Agency (DRDA), Lunglei buatsaihin Lunglei Town chhung Village Council Member leh Lunglei District chhunga Rural Development Block pathum Lunglei, Lungsen leh Bunghmuna Technical Staff te pualin DRDA Conference Hall, Lungleiah Jal Shakti Abhyaan “catch the rain” Campaign 2021 & Sensitization of Time and Motion Study on MGNREGS, Lunglei District hman a ni.

Inkhawm hi Pu K. Lalrohlua, Project Director, DRDA, Lunglei in kaihruaiin Khuallian Er. Ngentluanga, SE, PHED, Lunglei chuan khawvel sik leh sa a danglam nasa a, ruahsur hun a mumal tawh lova, tui hna a tlem tial tial a, hei hian mipui khawsaknaah harsatna nasa tak a thlen a ni a ti. Khawpui chhunga tuikhur kan neih sa te chei that bakah tuihna tihpun dan ngaihtuah a ngaih thu a sawi a. Luidung humhalh, luihnara thing leh mau awmsa te humhalh, thingphun tam, ram tihkan lohte, bawlhlawh paihna hmun dik taka paih te hian tuihna a tih tam a ring a ni. Tui harsatna sutkian nan sorkar laipuiin Jal Shakti Abhyaan “catch the rain” a duang a, hei hian a tum ber chu ruahtui luangral tur lo ven bakah khawl dan ngaihtuah a ni a ti. PHED Department chuan thingtlangah kum 2024 chhungin in tinah tui connection pek bakah School leh Aganwadi Centre-ah ruahtui khawlna siamsak an tum thu a sawi a ni. Tuihna tihpun kawngah thawhona tha tak nena thawk tlang turin VC te leh DRDA technical staff te a sawm bawk a ni.

Jal Shakti Abhyaan “catch the rain’ hi India ramah kumin March ni 22nd khan Prime Minister Of India chuan hawnna a nei a , hemi in a tumber chu India ramin tui harsatna nasa tak a tawk thin a, chumi sutkian nan ruahsurna apianga lo khawl leh a tangkai thei ang bera hmandan ni 100 (22nd March- 30th Nov. 2021) chhung inhrilhriatna atan lo hman a ni. Khawpui a thanga, mipui kan punga, boruak kan tichhia a, tui hna a tlem tial tial a chuvangin ruahtui khawl leh ruahtui hman tangkai dan inzirtir tum a ni. Hmasawnnaah tui hi dah pawimawh a ngai a, veng tinah tuikhur tha kan neih theih nan MGNREGS-a wages leh material component kaltlanga a proposal siam theuh turin VC te leh DRDA technical staff chah an ni.

He hunah hian Pu James Miahlung, DLAO, Lunglei, Er. Laltlanchhunga, EE (WATSAN), PHED, Lunglei leh Er. Lalropuia, EE (GLWS) PHED, Lunglei ten thu an sawi bawk.