Rural Development changtu Minister Pu Lalruatkima chuan vawiin khan Veterinary Diploma Holders Association Conference vawi 24-na hmanpuiin MGNREGA hnuaiah Mizoram sawrkar chuan wage component-ah cheng vaibelchhe 455.18 a dawng tawh a, material component ah cheng vaibelchhe 51 dawng tawh bawkin hemi bakah hian tun hnai khan cheng vaibelchhe 30 dawn belh a nih thu a sawi. January thla chanve thlenga mipuite inhlawhna pek theih beisei a ni, a ti bawk. VDHA Conference hi AH&Vety Department Polyclinic Conference Hall-ah neih a ni , Minister Pu Lalruatkima hi khuallian a ni.

Mipuiin eizawnna ngelnghet an neih theih nan sawrkarin kawng hrang hrangin tan a la tih sawiin chung zingah chuan Mizoram Sawrkar Flagship Programme SEDP kaltlanga hmalak tan mek a nih thu a sawi a. Rural Development leh Vety Department chu kawng hrang hranga thawkhovin ran vulhtuten ran hrisel an vulh theih nan ran in sak hna pawh RD scheme thenkhat kaltlanga thawh a nih thu a sawi. Conference hmangtute chu mahni hna hrechiang tur te, mahni hnaa rintlak leh taima tur te, sawrkarin dan a neih sa ang te hria a, danin a phut ang zela hnathawk turin a fuih a. Dawhtheihna leh hmangaihna nen, sawrkarin a chhawr chhan hre renga mipui tana rawngbawlna hna thawk turin Pu Lalruatkima chuan kalkhawmte a chah a ni.

VDA Conference ah hian Dr Lalremliana, Joint Director, AH&Vety Department chu khual zahawm niin an department nihphung, hnathawh dan leh thawk laite dinhmun tlangpui a sawi. Programme hi VDA President Pu Lalthlamuana’n a kaihruai a. Supermix Manufacturer Pu Lalrintluanga Pautu, Junior Vety Extension Officer (Rtd.) hnenah chawimaina hlan a ni bawk.