Vawiin khan I&PR Conference Hall-ah Joint Electricity Regulatory Commission (JERC) leh P&E Dept. hotuten kum 2017-18 Financial year atan a electric hman man siamdan tur rawtna chungchangah mipuite ngaihdan ngaihthlakna leh sawihona hun an buatsaih.

He hun hi electric hman man tihsan dan tur chungchanga Mizoram Consumer Union (MCU) leh People’s Right to Information and Development Society of Mizoram (PRISM) ten ziaka thuzawhchianna (written objection) an siam sawihona tura buatsaih ani. NGO te chuan mipuite tana harsatna thleng lo thei ang bera Electric hman man siam tura an rawtna chu ngaihtuahho ani a. P&E Dept. hotute chuan Electric hman man chu awmze nei taka chhut a, mite tana harsatna siamlo thei tur ang ber leh anmahni department Aggregate Revenue Requirement (ARR) ngaihtuah chung zela an siam thin anih thu an sawi a. Tun dinhmunah electric hman man chu Unit khat zelah cheng 4.14 ani a. Financial year thar (2017-2018) ah chuan cheng 4.75 a tihsan tum chhin ani a, a sanna tur chu za zela 6.74 anih thu an sawi. Mizoram chu North East State dang te nena khaikhin pawha electric hman man hniam ber pawl kan nih thu te an sawi bawk. A tuldan ang zela P&E Dept. lamte pawh insiamrema, chakzawka hmalak leh hnathawh anih theih nana theihtawp chhuah zel an tum thu an sawi bawk.