“Jet Airways-a thawkten Mizo Traditional Dress ha ve se.” -MYC Chairman Pu Joseph Lalhimpuia,  

Vawiin khan Jet Airways hotute chuan Mizoram Youth Commission Chairman, Pu Joseph Lalhimpuia chu a chenna inah an kawm a. Pu Joseph Lalhimpuia chuan mizo thalai eng emaw zat Jet Airways-a an thawk chu tha a tih thu a sawi a. Jet Airways Cabin Crew leh Ground Staff mizo thalaite tan Mizo Traditional Dress-a inthuam ni bik awm turin a duh thu leh, mizo thuam mawi tak hmanga  thalaite an inthuam theih chuan Jet Airways pawhin a mawi phah ngei a rin thu a sawi a. Jet Airways-in Aizawlah Cabin Crew mai bakah Ground Staff tura hna lak tam zawk nei tura a duh thu sawiin, kumin September hian Jet Airways hnuaia thawk tur lakna Recruitment Drive nei leh turin a sawm bawk a. Jet Airways hotute pawhin MYC Chairman ngaih pawimawhte chu  bawh zui an tum thu leh Jet Airways Recruitment pawh buatsaih leh ngei an tum thu an sawi a ni.

Nimin khan Mizoram Youth Commission Office, New Secretariat Complexah Jet Airways Cabin Crew Recruitment neih a ni a; Mizoram thalai mi 232 zet an interview a, hengho atang hian mi 29 shortlist an nih hnuin interview second round-ah (height & weight) mi 19 an tling a. Hemi hnu hian Group Discussion round-ah mi 12 an tling leh a, a la tling zawng hian vawiin khan interview fourth round hmachhawn lehin, heng mi 12 hian interview final round hmachhawn turin an tling leh vek a, April Ni 28, 2018-ah interview final round hi Mizoram Youth Commission Office-ah neih a ni dawn a ni. Jet Airways Cabin Crew Recruitment buaipuia Jet Airways Team Aizawl-a lo kalte hi Mumbai atangin Human Resource  Director, Pu Feroz Khan-in a rawn ho a ni.