Nimin chawhnu 2:30 pm khan Secretariat Conference Hall ah JNNURM Scheme hnuaia Aizawl khawpui kawng siam hna kalpui mek enpuitu High Level Monitoring & Supervision Committee (HLMSC) Meeting chu Committee Chairman, Pu R.L Rinawma, Principal Secretary, UD & PA Department kaihhruaina hnuaiah neih a ni. JNNURM hnuaiah hian heng kawngpui pawimawh tak tak pathum (i) Improvement & Widening of City Road Phase – I (Rs. 3873.40 lakh) (ii) Widening and Improvement of Vaivakawn to Mizoram University (Rs. 1907.64 lakh) (iii) Sihhmui to Mizoram University as spur of Aizawl City Road (Rs. 5309.32 lakh) te thawh mek a ni.

Heng project te hi tha tak leh tluang taka thawh a nih theih nan Committee chuan ruahmanna siamin hmalak dan tur hrang hrang te a ruahman a. Heng Project hnuaia kawngpui tihzauh chungchang te, kawngpui siam avanga lirthei veivak in harsatna a tawh lohna tura hmalakna hrang hrang te thlir let a ni a. Harsatna leh buaina thleng thei tur laka invenna chungchanga Local Council, YMA, etc. leh mipuite tawiawmna-na ah Committee chuan lawmthu a sawi a ni. Heng project te hi a hun tiam chhunga zawh a nih theih nan theih tawp chhuaha hna thawk turin PWD pawh beisei a ni.

He meeting ah hian Department hrang hrang Urban Development & Poverty Alleviation Department, Public Works Department, Power & Electricity Department, Public Health Engineering, Land Revenue & Settlement Department, Aizawl Municipal Council, Police (Traffic), Central YMA, MHIP Gen. Hqrs. leh MUP atangin an tel a ni.