2133/2025-2026

Lunglei, 2025 Sahmulphah thla ni 10: Vawiin khan Lunglei District Water & Sanitation Mission (DWSM) chu an Chairman, District Bawrhsap Pi Navneet Mann hovin a hna thawh pindanah an ṭhu khawm a. Vantlang thawh hona kal tlanga tui khawl leh humhalh tura hma lakna, "Jal Sanchay Jan Bhagidari" (JSJB) 2.0 kalpui dan tur an sawi ho.

Chairman Pi Navneet Mann chuan JSJB 2.0 chu Ministry of Jal Shakti hnuaia "Jal Shakti Abhiyan: Catch the Rain" Campaign hma lakna peng khat a nih thu sawiin, tui hna humhalh, tui renchem leh ruahtui khawl khawm te chu sawrkar kut chauh ni lovin, khua leh tui zawng zawng hma lakna tur leh thawh hona tur a nih thu a sawi a. Lunglei District-a mi tinin tui in tur leh hman tur hnianghnar an hmuh theih nan leh JSA: CTR leh JSJB 2.0 hma laknate a hlawhtlin theih nan sawrkar department, khawtlang hruaitu, tlawmngai pawl leh mipui vantlang te chu mahni zawnah ṭan la ṭheuh turin a chah.

Lunglei DWSM Member Secretary, PHED Lunglei Rural WATSAN Division-a Sr Executive Engineer Dr ZR Ṭhasangzuala chuan kum 2019-2024 inkara JSA hma lakna report pein, JSJB 2.0 kalpui dan tur tlangpui a sawi fiah a. Lunglei District-a JSJB 2.0 kalpui dan tur ruahmanna sawi ho zui a ni.

JSJB 2.0 hi tuizem leh tuikhuah siam leh enkawl kal tlanga tui awm sa humhalh leh renchemna tur leh lei hnuaia tui hna tipung tura hma lakna tur a ni a. Mipui tui mamawhna phuhru tur leh tui hna tipung tura sawrkar, sumdawng, tlawmngai pawl, khawtlang thuneitu leh mipuite thawh honaa hma lak chu he campaign hian a tum a ni.

JSJB 2.0 hnuaiah hian ruahtui khawlna tur tuizem siam te, tui luang riral tur venna khur (soak pit) leh tuikhuah (check dam) siam te, lei hnuaia tui hna khawl leh tipung tura hma lakna hrang hrang te kalpui a ni dawn a. Heti lam hawia hma lakna hrang hrangte chu June 2025 leh May 2026 inkar chhungin JSJB portal-ah theh luh tur niin, category hrang hranga hma la ṭha state leh district te tan lawmman siam a ni ang.

Lunglei District-a JSJB 2.0 kalpui turah hian department hrang hrang hnuaia tuizem, tuikhuah, khur leh tui khawlna siam tawh leh he lam hawia hma laknate khawn khawmin, Lunglei District dinhmun zir chian hmasak ni se, chumi aṭang chuan hma lak zui dan tur ruahman leh ni se, tih a ni.