No.2554/2020-2020

Aizawl the 29th June, 2020: Chief Minister Pu Zoramthanga hova COVID-19 dona atana hmalakna hrang hrang thlirhona leh kal zel dan tur inrawnkhawmna vawiina Assembly Annexe Conference Hall-a neih chuan Mizorama COVID-19 hrileng dinhmun ziaawm zel thlir chungin July ni 1, 2020 atangin zangkhai zawka Lockdown kalpui a rel.

He inrawnkhawmnaah hian ramri a local volunteer duty te tan a zangkhai zawka ruahmanna siam te rawt niin, khawpui a zan lam curfew chu a pangngai a la kal zel tha an ti tlang a. Lockdown thar kalpui dan tur kimchang zawk hi State Executive Committee of State Disaster Management, DM&R chuan a ruahman dawn a ni.

Chief Minister chuan Covid hrileng chuan mipuite kan nunphung pangngai tikhaihlakin, inkharkhip in hun rei tak kan awm tawh a. Vanneihthlak takin hma kan sawn zel niin a lang a. Kan ruahmanna te hi za a za a fel famkim nilo mahse a tlangpui chuan mi ram nen khaikhin chuan Mizoram chu entawntlakah min ngaih thu Chief Minister chuan a sawi a. Heng hi kan thawhhona a that vang a ni tiin Task Force leh NGO te, sawrkara thawktute leh mipui thuawihna chungah lawmthu a sawi. Chief Minister chuan Mizorama hrileng dinhmun ziaawm chho ve zel mahse India ram pumah chuan a chim sang lai a la thleng dawn chauh tia sawi a nih avangin fimkhur taka kan awm hi kan thlah nghal vek a fuh lo ang a. Chutihrual chuan mipuiin kan tlin tawk leh kan zawh tawh ngaihtuah chungin kan him tlanna tur ngaituah tel bawkin hma lak zel a tul thu a sawi a ni. Kan economy leh nitin nun dan ti buai lutuk si lo him thei ang ber si a kan kal dan thiam a ngai hle a ni, a ti.

Health Minister chuan tun dinhmunah Mizoramin case 151 a neih zingah mi 61 chu enkawl dam tawh, damdawi in atanga chhuak an awm tawh thu sawiin, he natna hri do tur hian mipui leh sorkar thawhhona rah tha kan hmu a ni, a ti a. Post-Lockdown kalpui dan tur uluk taka ngaihtuah a, a zawmtu turte pawhin theihtawp kan chhuah tlan a ngaih tur thu a sawi a. District sawmah TrueNAT khawl dah theuh tura ruahman a nih thu te, USA atanga RT-PCR khawl beisei mek a nih thu te a sawi a. Tun hrileng avang hian tlawmngaite leh sorkar hnathawktute an fakawm thu sawi bawkin, kawng hrang hrangah chanchin lawmawm kan hriat zel thu Health Minister chuan a sawi a. COVID-19 dedicated hospital ZMC damlo mi 160 dah theihna tura ruahman chu Covid damlo an awm (admit) tam ber laiin mi 70 an tlinglo a ni tiin vanneihna Mizoramin a chan zel thu a sawi.

Home Minister Pu Lalchamliana chuan Lockdown tihzangkhai duhna rilru kan pu hlawm a, kan dinhmun enin a awm viau a ni, a ti a. Chutih rual chuan social distancing hi kan ngaih pawimawh leh zual a tul niin a lang tiin Task Force duty te leh Police Flying Squad ten lockdown bawhchhia te atanga pawisa chawitir tlingkhawm chu Rs. 28,91,800 a tlin tawh thu a sawi a. Home Minister chuan Mizoram mipui Covid hrileng laka an him theihna turin mi 2900 chuang zet chu post 491 ah duty an awm thu sawiin, post 339 ah Task force duty in, post 27 ah police an duty bakah post 125 ah task force leh police te an duty kawpna a awm thu a sawi a. Task force mi tlawmngai tak takte an rim tawh em avangin duty dan pawh inchhawk zangkhai dan awm se tiin rawtna a siam a ni.

He hunah hian Speaker Pu Lalrinliana Sailo, I&PR Minister Pu Lalruatkima leh H&FW Board Vice Chairman Dr. ZR. Thiamsanga ten thu sawi bawkin, Lockdown inthlahdul tan dawn mah ila, mipui kan la fimkhur tlan viau a tul thu an sawi a ni.

Chief Secretary Pu Lalnunmawia Chuaungo chuan tuna Mizoram dinhmun tlangpui report pe in, Mizoram state pawn atangin tangkhang mi sing khat chuang inhruaihaw tawh thu te leh quarantine dan dinhmun a sawi a. Quarantine tawh ho zawng zawng, quarantine facility hrang hrang a an awm dan chu 55% chu sawrkar quarantine centre ah awmin, 25% chu kohhran leh khawtlangin an buatsaih community quarantine facility ah, a bak zawng chu home quarantine leh paid quarantine (hotel) a awm an ni a. Quarantine te zinga 92% chu sawrkarin an ei leh in a tumsak a, a bak 8% chu kohhran emaw, khawtlang/ task force in a tumsak emaw, mahni a intum an ni thung. India ram hmundang atanga lo haw tur sorkarin an lo kal na tur buaipui ngai mi tlem la awm chu task group leh an awmna Mizo Welfare te nen ruahmanna siamin an lo haw thuai beisei a nih thu a sawi a. Sawrkarin a buaipui ngailo a mahni duh thu a thlawhna a lo haw an awm zel thin thu a sawi bawk.

Vawiin inrawnkhawmnaah hian Assembly House Speaker Pu Lalrinliana Sailo, Health Minister Dr. R. Lalthangliana, Home Minister Pu Lalchamliana, I&PR Minister Pu Lalruatkima, H&FW Board Vice Chairman Dr Z.R. Thiamsanga te telin, CS, DGP, Finance Commissioner te, Mizoram Kohhran Hruaitu Committee, NGO Coordination Committee, All Mizoram Village Council Association, Aizawl City Local Council Association leh Indian Medical Association aiawhte bakah sorkar department a hotu pawimawh te an tel a ni.