Chief Minister Pu Lal Thanhawla chuan ‘Ka Mizopuite chunga kawhmawhbawlte chu pialral thlengin kan um ang a, kan ngawi reng bik lovang’ a ti. He thu hi ningani kalta ni 7 January 2010 a Jampui tlangdung, Tripura tlawha Zo Hnam Khawmpui a hmanpui ni a a sawi a ni a. Chief Minister hian he khawmpui hi hmanpui paha Zampui tlangdunga Mizo chengte thlamuan tur a kal a ni a. He tlangdunga khawtini mai chuan lo hmuakin,Pu Lal Thanhawla chu ‘Zofate Chief Minister’ tiin leh ‘Zofate Muantu’ tiin amah chu an thlamuanpuizia nasa takin an tilang a ni.Chief Minister hian Tlangsang khaw bul Sakhan Tlangah Hlaphuah thiam Siamliana leh Sibuta’n sial anga a chhun hlum Nula Darlalpuii te hriatrengna lungphun a hawng a ni.

 

 

‘Zo hnam Khawmpui’ vawi 2 - na Tlangsang khuaa neihah Chief Minister chuan Zofate chu Pathian zawnchhuah hnam, pipu hunlaia kan chhehvela midangte chu Islam sakhuate, Hindu leh Buddhist ten an lak vek laiin keini chu min thukru a, kumpinu sorkar hmangin chanchintha engin min rawn zawng chhuak ta a ni a ti a.Chuvangin kan thil tum reng rengte hi Pathian lam tang a ni tur a ni a, chu chuan hlawhtlinna min pe thin a ni a ti.Zofate hi British sorkarin India ah te, Burma ah te leh Bangladesh ah te min thendarh a, Indiaah pawh Mizoram bakah Manipurah te, Assam ah te leh Tripura ah te thendarhin kan awm a. Kan hriat tur chu kan awmna state theuhah a khua leh tui dik dak niin, rinawm taka kan awm a tul a ni a ti. Tripura Zofa ten insuihkhawm lehna tura hetianga hma la-a, inkhawm thupuiah ‘ Zo Inpui Sak’ an thlang chu a inhmeh hle a ni a ti.

Chief Minister chuan Zampui tlangdunga Mizote chu intodelh  hle mahse tanpui an ngaihna ah chuan helamah tanpuitu hnai reng kan awm a ni a tiin, thlamuang taka awm turin a chah a.Sorkar angin a theih chen chenah hmui che u kan tum a ni a ti. Bru refugee campa awmte chungchang a sawiah Mizoram tui leh khua dik tak awmte hi ringtu an ni a, lokir leh a an inbenbelna tur te pawh central sorkar nen rehabilitation road map te kan siam sak a, chutichungin an lokir leh duh silo chu a pawi hle a ni a ti a.Kan State pawna awm an nih avangin tih theih kan neilo a ni a ti. Hman lawka Mizo tlangval thah anih chungchangah misualte thil tih dolet leh nunaute ven leh chhawmdawl hna thawh angaih avangin tual thattute chu umzui hman an nih lova, chuvangin kan la man thei lo a ni Chief Minister chuan a ti. Bru nia hriat ten Mizote chunga kut an thlakna te hi misual thil tihah kan dah a, kan thungrul ngailo a ti a. Centrala diklo taka min hekna thin pawh Asian Centre for Human Rigths te pawhin thu diklo an lo chhuah thin thu-ah ngaihdam an dil thu a sawilang nghe nghe a ni.

Tripura a Mizo hnahthlakte hi Halam - Kuki tia hriat an ni a. Chungte chu: (1) Halam (2) Kuki (3) Lushai (4) Ranglawng (5) Mualthuam (6) Kaihpeng (7) Hrangkhawl (8) Chorai (9) Bawng (10) Bawngcher an ni a. Hetah hian peng engemaw zat Darlawng, Ralte, Hmar, Sakechep, Hmarchaphang, Saihmar, Kozai, Belte, Ngente, Thangluah leh a dangte an awm a ni. Zo Hnam Inkhawmpui ah hian hnam peng hrang hrangte hian anmahni hla leh lam theuh te an entir a ni.

Chief Minister hi West Phaileng lam atangin Zampui tlangdung hi a lut a. Zawlnuam, Mamit lam kawngah Aizawl panin nizan khan dam takin Aizawl a lo thleng a ni. A kalna kawng khawtinah amah hmuahna vantlang inkhawm an lo buatsaih a ni.

Chief Minister hi a nupui Pi Lal Riliani bakah Dampa bialtu MLA Lalrobiaka leh Hachhek bialtu MLA Lalrinmawia Ralte ten an tawiawm a ni.

Zo Inkhawmpui hi Art & Culture Minister Pu P.C.Zoramsangliana pawhin a hmanpui bawk.